Juste une interuzion aes contis, in chest moment dulà che ni nestris Corsecurtârs a son daûr a scrivi il lôr toc pe tierce Zornade a teme “Fieste“, par pandi une gnove suntun event di cheste setemane che in part nus rivuarde.
Come che o savês “La Patrie dal Friûl” al è un gjornâl che o vin a cûr, sedi par che al è un dai pôcs dut par furlan, sedi pal fat che la nestre Coghe e scrîf parsore, insieme a cualchi altri nestri Contecurtâr, e timp indaûr ancje l’Ostîr, e sedi pal so spirt autonomistic, che insome, a noaltris di Contecurte, che o sin ducj avonde libars intal spirt, nol pues no plasênus.
Si che duncj, chest event, programât pal mês di Zenâr, e colât ju tal lunari per vie dal infet, al è rivât al so timp propi vinars che al ven, ai 25 di Març.
Chi adalt o vês la locandine di dut l’event, che al à cjapât dentri une vore di int par stâi dongje ae Patrie. Si davuelzarà al Teatri San Zorç, a Udin, che al è biel grant e sarès biel di rivâ a jemplâlu di amîs. Il motîf al è propite chel dal titul dal event: dâi une man al gjornâl, che come par tantis robis, nol à sigure vite facile, di chescj timps.
Ce altri? Ah, sì, di noaltris di Contecurte o cjatarês ancje un alc fat de Coghe e dal Ostîr, che a son stats invidâts a fâ lis voris de Ostarie e a àn acietât cuntune vore di gust! Us spietin
