In cjar e vues!

Forsit cualchidun di voaltris plui babio, o plui curiôs, si sarà bielzà inacuarzût de gnove, ma cumò e je vignude la ore di un biel anunzi in pompe magne. Al è un biel pôcs di mês che l’Ostîr e soredut chê puarete de Sartore i lavorin parsore, e al è ancjemò un biel pôc di lavôr di fâ, ma chel che al è fat nus pâr avonde par vierzi chest gnûf cantin de Ostarie.

Ma come ogni licôf bisugne ben contâ cemût che o sin rivâts achi, no mo? E alore podìn dî che di cuant che la ostarie e je nassude, tal 2009, no vin mai passât un an cence fâ un event o un alc che nol sedi virtuâl, ma reâl. Che e sedi une leture in public, o une competizion di contis, o cualchi matuçade chi e là, Contecurte no à mai pensât di sedi dome virtuâl. Anzit… nus è simpri plasût che dongje di un nickname, un articul, un sît, si puedi lâ a cirî la persone, in cjar e vues, par podê cjalâsi, bevi un tai insiemi e contâsale.

Si visin ancjemò il prin event, nuiemancul che a Friuli Doc, cui libruts fighets, ator pes Osteriis di Udin e lei lis nestris contis. Ma si visìn di jessi stâts sul cjistiel, tai rudinaçs, intun vagon, tes scuelis, tai teatris, intun mulin, ator par Udin, tes bibliotechis, in radio… Insome. O vin cumbinadis un pocjis. Zire e volte trente e passe events e leturis (cussì si clamave la pagjine di prin) sparniçâts dilunc dîs agns e ator pal Friûl.

Ma parcè vino fate cheste robe? Memorie, tant par scomençâ. Vin metudis lis fotografiis, vin linkât i articui che a fevelavin di chês ocasions e cuasi simpri o vin metût il librut in pdf di podê scjamâ cu lis contis. E un al podarès dî: “Eh, bon, ma tant lis contis a son za dutis su la osterie, se vuei o voi a cirîlis!”

Ma no je mica vere! Intant parcè che al è capitât che l’Ostîr, ogni tant, al vedi scrit des contis che a jerin fatis dome par un ciert event, e letis dome in chê sere. No simpri chês contis a son stadis publicadis, e cumò invezit sì, a son dentri tai libruts. E po dopo si puedin cjatâ ancje altris materiâi, come la schede “Lei par furlan” o lis istruzions par scrivi contis curtis par furlan, o pûr lis intervistis fatis a Ce contino a San Zorz… insome, une vore di robe.

Nol è ancjemò dut. Nus mancje di meti adun ancjemò cualchi event, ma planc planc, prin o dopo le cumbinarìn. Anzit, se par câs o vês fotografiis o materiâl di cualchi event, mandait che o zontìn. Ancje parcè che intun sît plen di robe come il nestri al va a finîle che si dismenteisi di dulà che si ven e ce che si jere. Cun cheste pagjine si dismentearin un pôc mancul. 🙂

Ma vonde cjacaris. E je ore di screâ cheste gnove pagjine de nestre ostarie che o cjatais là adalt o, par i sflacjons, achì sot:

in cjar e vues

1 comment