La Ultime Conte dal Mês!

O sin rivâts insomp e volêso savê une robe? L’Ostîr nol à scrite ancjemò une rie de ultime Conte dal Mês, la conte di Dicembar, il regâl che o fasìn ai iscrits te Liste di Contecurte ai 16 di ogni mês.

O vês za capît de imagjin cuâl che al sarà il teme de conte e dal articul de Coghe Fuguline, ma sperant che la conte e ledi ben e i salti fûr decente, o sin chi par spiâus altris gnovis  che o vin tal cjâf par sierâ chest 2020 in ben.

La prime robe al è un regâl par ducj i iscrîts ae nestre Liste che a son rivâts un pôc dopo. O vin decidût che o darìn la pussibilitât di scjamâ ancje lis Contis dal Mês che si son pierdûts, ven a stâi chês dai mês prime. Da rest al ven dongje Nadâl e al è just jessi gjenerôs… Ma si come al è just ancje vê rispiet par chei che a son i nestris fan plui fuarts, lis contis vieris a saran disponibilis dome par un timp limitât. Daspò a saran scanceladis de rêt e no si podaran plui discjamâ. Insome… a nô nus pâr une buine ocasion par cui che al à vût plasê di vê let lis ultimis contis e al vûl recuperâ il storic di cheste aventure durade un an intîr.

E al è propite il câs di dîlu che cui che si iscrîf ae nestre liste di cumò ai 16 di Dicembar al fâs pardabon un afâr! ISCRIVEITSI! Come simpri us visin che al baste someti la direzion di pueste eletroniche achì sul sît e visâsi di fracâ il leam te mail di conferme che us rive daurman.

Ma no je mighe la uniche gnove, eh. O vin pensât che no si pues sierà l’an cence une altre LOTARIE e alore velu li, un altri regâl par i iscrits ae nestre liste di Contecurte. Un altri bon motîf par iscrivisi te Liste, par vê ancje voaltris il vuestri numar pe lotarie; insome, ancje se no savin ancjemò cuâi che a saran i premis ma… o vin tal cjâf alc!

E dopo? Finide cussì? Ma ce! O vin ancjemò cualchi sorprese, ma stin metint adun lis robis. Intant voaltris sparniçait chest articul e soredut invidait la int a iscrivisi ae nestre Liste!

Chei di Contecurte

3 coments On La Ultime Conte dal Mês!

  • Aromai a sin tal 2021, par furtune, e o savin che l’Ostarie si è cjapâde qualchi zornade di polse!!!! Ma si fâs dongje il 16 e NUS MANCJE MASSE LA CONTE DAL MÊS!!!!!!!!!! Ere deventâde une piçule tradizion, un apontament sfodrât di SORPRESIS!!! O spietavin di scuvierzi l’articul, la cuviertine, la conte e qual cal fos il personaç, par podė partâlu o partâle cun no atôr pes nestris zornadis; e po dopo le stât un plasè pai piçui aiutants e par me podè “judá” cun qualchi dissen! (che o vês soportât cun tante pazienze!!!!)GRASSIE COGHE, OSTÎR, SARTORE PAR CHEST BIEL VIAÇ FAT INSIEME!!!! E GRASSIE A DUCJ CHEI DI CONTECURTE!!!! Nus vês regalât tante ligrie e vês fat un spetacul di lavôr!!!!!!!!
    MANDI!!!!
    Mery

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît