La Conte dal Mês di Novembar

PURCITS!

No, no, no stêt ofindisi, no us disevin a voaltris. O fevelavin de Conte dal Mês di Novembar, che lu vês bielzà capît dal nestri super dissen di jessude fat dai Piçui Aiutants di Contecurte Jacum e Ricart, e fevele di purcits.
O miôr… forsit e fevele di purcitârs, e no si podeve fâ di mancul, par chest mês di Novembar, cul infet che al è tornât e noaltris furlans che come par solit o vin di patî. E alore, noaltris di Contecurte, o vin pensât di butâle sul ridi, almancul un pôc.
Par prime robe us visin che dentri de conte dal mês scrite dal Ostîr o cjatais i leams per lei o tornâ a lei lis contis sul sît a teme dal purcit, che a son dutis ironichis o cuasi e une ridade us a la robin sigure.
Pe seconde robe, e achì, se un nol è iscrit ae liste di Contecurte, bisugne propite che al proviodi di iscrivisi (che tant al è di rive jù) e che al cjale il pdf che i rive doman. Eh sì… parcè che par chest mês o vin tirât dentri te conte dal mês nuie mancul che il nestri Berlon! Isal o no isal un atôr, o vin pensât, e alore lu fasìn recitâ! E nuie… no us disvelin di plui, ma o vês capît che al sarà plui di cualchi sorprese, dentri te conte.
Finide chi? Eh no, al sarà, come ogni mês, l’articul de Coghe Fuguline che us fasarà cognossi une vore di robis dal purcit in Friûl.
Cumò o din dut in man a la Sartore, parcè che il taiâ e cusî di ordenadôr chest mês, al è un pôc plui fastidiôs. Ma o sin sigûrs che doman di sere, puntuale come simpri, us rivarà la Conte dal Mês di Novembar,
A proposit… si intitule “Vues”.

Mandi a ducj
Chei di Contecurte