Fueis

A Nadia i jere simpri plasude la cjase de none. Grande, cul puiûl plen di gjeranis ros e la rie di pôi a ôr de roie che e coreve pôc daûr.
I siei si jerin trasferîts a Milan che e jere ancjemò frute, ma no viodeve la ore, ogni an di Istât, di lâ in vacance là de none. Là e cjatave lis sôs cusinis e a podevin zuiâ dut il dì tai prâts. Prin di tornâ a Milan e meteve simpri une fuee di pôl tes pagjinis dal diari, par visâsi di chês zornadis plenis di soreli.
Dopo lis scuelis, par tancj agns si smenteà de vecje cjase: lis vacancis cumò a jerin aventuris di vivi vie pal mont: l’Interrail dopo la maturitât al fo dome il prin di tancj viaçs cui amîs o cul morôs, che une dì al jere deventât it so om.
Tornâ in Friûl, dopo tancj agns a Milan, al jere stât biel e strani tal stes timp. La separazion e fo une vore dificile par Nadia, ma il so om, daspò che al veve cjapade chê decision, par nissune reson al varès cambiât idee.
Une sô cusine i veve proponût un lavôr tal so ufici di Udin. Sì, forsit cambiâ ambient dal dut e jere la robe juste di fâ. La cjase de none e jere vueide di cualchi an, ma cun pôcs lavôrs e sarès stade perfete. Nadia no veve mai vude la machine a Milan, cussì a Udin e sarès lade cul tren, e di cjase ae stazion di Codroip in biciclete.
La ciclabil gnove e coreve lungje e drete come un nastri di vilût neri a ôr des cjasis cui zardinuts petenâts. Il lusôr dorât di Setembar i dave la fuarce di un gnûf inizi. Di sere cuant che e tornave di Udin e pedalave viers il cîl inrossât dal soreli che al lave a mont. Lis fueis zalis dai pôi sparniçadis sul asfalt neri a segnavin un troi segret che dome jê e viodeve, une strade che e partive des pagjinis dai siei diaris di frute lant viers un gnûf doman. E ancje se chê stagjon ducj le clamavin Sierade, par jê e jere une viertidure.
Ma cul passâ dal timp lis robis a cjaparin un altri binari, un binari muart. Cui gnûfs coleghis no rivave a leâ, le cjalavin come une citadine, diferente di lôr. E i paisans compagn. La cjase e jere masse grande e vueide par jê. Cuant che e tornave di Udin di sere, il cîl al jere zaromai scûr, la ciclabil cence lusôrs: Nadia e pestave plui fuart sui pedâi cirint di no pensâ a ce che al podeve platâsi tal scûr.
Cumò i someave che lis fueis i fevelassin. E che i disessin cussì: Sâstu che no tu esistis? O, se tu esistis, tu esistis mâl? Cemût mai no tu ti sês inseride? O pûr: A nô fueis, vûstu ben? Vuai se no tu ti sometis al nestri amôr!
Nadia e restave tal jet cui voi vierts a cjalâ il sofit… se ju sierave e viodeve plen di fueis che i balavin ator par dut, e sintive simpri lis vôs, no dome par strade ma ancje a cjase sô. La buere di Novembar e ingrumave lis fueis fûr de puarte, cuasi che a volessin rivâ fin dentri in cjase.
Une dì Nadia e vierzè il barcon tremant come un pôl, e cjalant jù e viodè un grum di fueis alt cuasi un metri. “Butiti! Butiti che al è fof! Butiti che o zuìn insiemi!”
La polizie e cjatà il cuarp di Nadia la dì dopo te roie, mieç taponât framieç des fueis zalis.

di Stralunade
#1039
Conte rivade seconde a Vôs de Basse 2020

1 coments On Fueis

  • Conte robuste che da gjonde finis inte maluserie, un grum di voltis il scombussolament dai events di vite distrugin il ben stât e chel recent. No simpri il proviarb ” La che si nas, ogni jarbe e pas”. Lussian

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît