Vôs de basse – Lis premiazions

Va ben contecurtârs. Le vin petade. Aromai l’an bisest al pareve no volê plui regalânus une serade cun dentri un pocje di Contecurte, ma in gracie de nestre Coghe Fuguline, che e je stade anime e sproc di Vôs de Basse, o vin rivât a cumbinâle.

Al varès di sedi un articul informatîf, chest, ma us disarin ancje cui che al à vinçût e ce che al è stât fat inte serade di premiazion di Sabide, ai 24 di chest mês. Ma intant o vin di dî che nô di Contecurte o sin contents.

Contents parcè che l’invît dal Ostîr, di un an fa, a partecipâ a chest concors di contis curtis par furlan al è stât cjapât sù di plui di cualchi contecurtâr e contents ancjemò di plui che i nestris contecurtârs a vedin fat biele figure. E contents di cjatâsi, di rivâ a fâ un pôc i stupits prime di lei lis contis e di podê dî di vê fat almancul un spetacul di cualchi bande, in chest an sfigât.

Ma vignin a la croniche, ancje parcè che o spietìn seneôs che i autôrs des contis nus mandin i lôr lavôrs – lets dilunc de serade – pacè che o podedis lei lis contis, e no dome l’articul che al fevele di lôr. Da rest, son contis curtis, e noaltris no podevin che jessi in prime file tal sparniçâ e pupilâ chest “Vôs de Basse”. 

Ma scomencin dal inizi, ven a stâi de premiazion dai fruts, che si è davuelzude tal daspò misdì e che al à viodût vinci la poesie “La mê mame” di Sofia Pinto, in bande dai premiâts Davide Fogolini e Luca Turolo, cun “Il mâr” e Giorgio Pivetta, cun “L’Autun”. E prime il spetacul di Michele Polo e Giorgio Parisi (inte foto) che al à gjavade plui di cualchi ridade e cjante cul spetacul “Une lenghe, un doman”. E al è stât biel che cundut dal periodi no masse biel, a sedin rivâts in tancj fruts a cjapâ il premi.

La premiazion dai adults e jere pôc dopo, e a musicâ lis poesiis, dôs di chês che a àn vinçût lis edizions passadis e lis trê finalistis di chest an, a son stâts nuiemancul che Jacopo Casadio e Davide Sciacchitano (o cuissà, forsit a jerin Jacopo Sciacchitano e Davide Casadio, sâstu mai) dai Luna e un quarto. A àn fat un grant biel lavôr, metint in musiche poesiis, e cirint cussì di lâ incuintri ae sensibilitât dai poetis che lis vevin scritis. I risultâts a son stât une vore biei e al va pardabon dât il merit a chescj doi artiscj di vê vût pari bravure. Al valeve la pene di viodi la premiazion dome par chest esperiment.

E dopo? E dopo e jere la nestre volte! Ostîr, Famei e Berlon a si son vistûts di ninja-furlans e armâts di sape, pale e ristiel a si son sfidâts leint lis sîs contis che miôr si son plaçâdis tal concors. Par jessi precîs, chest la liste dai scuintris, che prest o podarês ancje lei achì su Contecurte:

Torse Sand Creek – La cjase zâl zafaran

La crepe – Une storie piçule

Il perdon di Justin  – Fueis

E no us disvelin nancje cui che a son ducj i autôrs, e savêso parcè? Parcè che o sin sigûrs che nus mandaran la lôr conte par podê publicâle achì su la nestre Osterie e sperin ancje che no sedi la uniche, parcè che o vin voie pardabon di deventâ un pont di riferiment pe leteradure curte furlane.

E alore, intant che o sin in spiete des contis, o podin però disvelâus cui che al à vinçût.

Prin classificât, sedi par il public, sedi pe jurie, il “nestri” e podìn ben dîlu, Garzon de Ostarie Gianfranco Pellegrini, cuntune conte pardabon perfete, che no viodin la ore di lei. (E achì o sin sigûrs che e rive, stant che al è inmò sot paron dal Ostîr e nol pues dîsi di no). Torse Sand Creek la sô conte.

Ma lis sorpresis no finissin chi. Al è capitât che la seconde classificade e sedi stade Fueis, induvinait di cui? De nestre Sartore Astrid Virili! Che al è clâr e je stade premiade dal Ostîr in persone. Fueis, il so toc, e o vin savût che je e je ancjemò in estasi e no crôt di jessi rivade cussì ben, stant che e veve scrit la conte dome parcè che “L’Ostîr la finìs di rompi i durions”. Insome… O podìn dì che scrivi par contecurte al fâs ben, Ancje parcè che al jere ben cualchi contecurtâr platât ta chês altris contis, e ancje chês no viodin la ore di fâusalis lei.

Tierç classificât, Diego Navarria, cuntune conte storiche, La crepe, une vore ben curade, e segnalât Davide Ballaminut, cuntune Storie piçule. Int che o sperin di viodi prest inte nestre Ostarie cu gnovis contis.

E no stin dismenteâsi des premiazions de poesie, che a àn viodût come vincidôr un adorabil Stefano Lombardi, cul componiment “Lagrimis”. Giacomo Vit, cun “Mê mari e il mâr” e Chiara Savorgnan, cun “Nono” a son stâts chei altris doi premiâts.

Insome… ce dî? Che e je stade une biele serade. Che ARLeF, SFF e Sportel Furlan Basse Furlane cun ducj i siei Comuns a àn dât un grant contribût e che la nestre Coghe Fuguline e je stade super, a meti dongje dut.

Ma savêso cuale che je la gnove finâl? Che e je jessude une publicazion cu lis contis premiadis e lis poesiis des ultimis trê edizions, Vôs de Basse, par cure propite de Filologjiche Furlane, regalade a chei che a jerin te serade e che – gnove inmò plui biele – la cuarte edizion di Vôs de Basse, tal 2021, si fasarà! E nô o sin une vore contents e za di cumò o tachin a dî che bisugne saltâ fûr dal scûs e fâ cressi lis robis che a meretin cressi. Come cheste.