Lotarie di Setembar: vêso vinçût?

E îr di sere, propite pene rivade la Conte dal Mês di Setembar, Fros, o vin fate ancje une super Lotarie, che magari cui che al è su facebook al varà ancje za viodût.

Tant par scomençâ, o vevin i premis adats pe ostarie, cul nestri super sponsor Friûlpoint che al à vistût sedi l’Ostîr, sedi i Piçui aiutants di Contecurte. Prin premi il grumâl, che no si pues sigure vê une Ostarie cence grumâl. Po dopo lis dôs cjicaris, strachis ma legris, e ae fin ancje il puarteclâfs, che us covente soredut cuant che o vignês fûr de ostarie, par cjatâ la clâf di podê jentrâ cjase a scûr.

Ma cemût vino fate la Lotarie, chest colp? Eh… o vin metude adun une robe sofisticade. Ae fin de conte dal mês, dopo l’articul de Coghe, insiorât dai dissens piturâts di Jacum e Ricart, o vin metût un biel test. Partint dal vuestri numar segret, che us è rivât te mail de conte, e lânt daûr des istruzions, o podês scuvierzi se o sês Benandants o Striis, la bestie che o doprais tes vuestris scorsenadis e la arme che o tignîs in man, in bande dal soròs o dal fenoli.

Si che duncje, cui aial vinçût la Lotarie? 

A àn vinçût chestis trê cumbinazions!

  1. Un BENANDANT a cjaval di un GJAL cuntune bachete di COCOLÂR
  2. Une STRIE a cjaval di un RIç cuntune bachete di SAÛT
  3. Un BENANDANT a cjaval di un BOLP cuntune bachete di CJARIESÂR

Sì che duncje, se tal test us ven fûr une di chestis cumbinazions, rispuindêt ae mail, che o vês vinçût i premi de Friûlpoint!

Un Mandi a ducj, e ariviodisi al mês che al ven!

3 coments On Lotarie di Setembar: vêso vinçût?

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît