La Conte dal Mês di Setembar (cun Lotarie)

O sin cuasi ai 16 dal mês e come simpri il countdown, achì sul sît, al tache a cori plui svelt. A mancjin doi dîs, trê oris e trentecinc minûts a la scjadince de conte dal mês, il regâl che noaltris di Contecurte o fasin a ducj i iscrits ae nestre mailing list aromai dal mês di Zenâr. Sino pronts?

Sì, al mancje dome il dissen pe cuvierte, e daspò ducj i tocs de conte a varessin di jessi a puest. L’Ostîr al à rivât a meti adun la conte, che come che o podevis intuî dal titul, chest mês si clame FROS.

La coghe Fuguline, ancje je simpre indafarade, e je rivade a meti dongje un biel articul sul argoment di chest mês, e us podin za dî che la conte e je ambientade nuiemancul che inte zornade di joibe ai 17 di Setembar.

La Sartore, difati, e je seneose in spiete di meti mans sul lavôr par impagjinâ e meti adun la cuvierte. L’argoment? Chel no si spie, ma cuant che miercus di sere us rivarà la conte inte pueste eletroniche (e mi racomandi, cjalait de caselute des promozioni, che nol è spam) o scuvierzarês ancje une altre sorprese.

La sorprese no si spie, ma e je colegade a une altre Lotarie, parcè che chê altre volte si sin divertûts cetant a dâ i numars che o vin decidût di dâju ancje chest mês. I premis? Ah, ben po, o vin fat lis robis in grant e o vin cjatât come sponsor dai premis nuiemancul che FRIÛL POINT!

Sì, propite lôr, i autôrs des maiutis e des mascarutis plui furlanis di dut il Friûl!

Ma ce vêso di fâ par partecipâ a la Lotarie? Nuie, se o sês za iscrits ae Liste di Contecurte. Se invezit no sês inmò iscrits, alore movêsi! Iscriveitsi! Al baste someti la vuestre mail intal spazi di pueste, achì sul sît, e dopo visâsi fi fracâ di sì a la mail che us rivarà. Cussì no dome o podês partecipâ a la Lotarie di joibe di sere (estrazion in direte facebook tor lis 19.15) ma ogni lunis, come a che ore chi, o ricevarês lis gnovis de Ostarie, par no pierdisi nissune iniziative e nissune conte.

Ben po… al è dut. Anzit. No. Se no us vin stiçâts avonde, ve chi che us lassin l’incipit de conte di Setembar, che insome… al è une vore potent! E no stêt dîsi che no vês voie di viodi cemût che e va indevant.

FROS

Si lis viôt rivâ di çampe.

Lis cuessis secjis e crotis a strenzin il cjalin dal pêl dai becs. Lis lenghis di fûr, vuiscjadis dal vint, si jemplin di moscjis, che lôr a çupin e glotin colp par colp intun pacjâ di lavris che no àn dincj di platâ. I voi no son voi ma sieraduris di lûs tombadice robade ai cimitieris e folcjade dentri des grispis che ur tegnin dongje la muse tant che cusiduris. Bocje, nâs, sbeçule, cerneli, flât, smursiei… no si ju dicern, ma si ju intive, li dentri, a marcolâsi e misturâsi, ribaltâts flaps e ledrôs, ma grampâts in chel berlarili e in chê asse che i sblancje lis aìnis. I ombui sclagns e scalembris a crochin e crochin dentri dal crocâ di çucui, lis ongulis a sgrifignin i cuars vuicant e cualchidune si spache, sanganant, ma no mole la bestie. Si tegnin dûr cui cjavei, cui pêi, cui sbrendui di piel slichignote des tetis intant che a sdrumin une blave une vît un ort o un filâr di pomis. Intune man un baston e un fros a svintulâ, sflochetât dal aiar. Une gjernazie cence divignince e pudôr che si fâs brentane e cence dûl e fische e sbreghe e sbridine.

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît