La Conte dal Mês di Mai

Cui sono chescj cuatri chi, de imagjin? Flôrs, fueis e len che a cjapìn vite e che i nestris Jacum e Ricart, i Piçui Aiutants di Contecurte, cul jutori dal Ostîr, a àn piturât cul dissen di jessude de Conte dal Mês?
Nol è dificil di scuvierzi, parcè che usgnot vuê o sin ai 15… e doman o sin ai 16. Cemût? I contribûts che a scjadin? Il versament de IVA? Ma no!
Ai 16 e je rivade la zornade de Conte dal Mês!!!
Il regâl che noaltris de Osterie o fasìn a ducj i iscrits di Contecurte.
Chest colp no us spiìn cual che al è l’ogjet de conte, ma la Coghe si è superade, cuntun articul che al tire dentri e al conte plui di une tradizion furlane.
L’Ostîr, pûr trop, si è lassât cjapâ la man dai personaçs de sô storie e al à scrit une conte lungje… cun cuatri di lôr che a àn une etât dulà che il mont si lu viôt intune cierte maniere.
E chest zîr, in nestri ostîr al à volût coinvolzi Angelo Furlani, un poete furlan pôc cognossût, ma che al Ostîr i plâs, e che i à regalât, scritis di pueste su rischieste, des piçulis poesiis sul teme de conte. (Dopradis dutis).
Cualchi indizi, forsit, lu varês dal titul… e dal incipit de Conte che us lassìn, par stiçâus a iscrivisi ae Liste di Conte curte, se no sês iscrits, o ancje dome par visâus che domenie e je la scjadince par podê votâ lis contis dal CovidCurte Day 20, e chei che a àn votât e votaran a varan un piçul regâl in plui… Insome… si din da fa, soredut la Sartore, puarete, che vuê e doman e varà di lavorà come une mate par impagjinâ la storie e meti adun la cuvierte, come simpri cjolte di un dissen dal Ostîr.
Al è dut, par vuê! A doman cu la conte dal Mês di Mai…
________________________

Butui

Une machine!
Intes stradis vueidis dal paîs indurmidît si le sint a rivâ di lontan. A indi son passadis trê, forsit cuatri, tes ultimis oris, tibiant la taronde di buride e lassantsi a schene il barlumâ ros dai ferâi. Da rest, ancjemò no si pues lâ inniò e il cjant dai grîs, sot sere, al sturnìs di cetant che al revoche dai rivâi. Ma cheste machine achì e va planc, e Aruna al intive alc che lu sburte a ficjâsi dentri dal scûr di un puarton. Miôr spietâ che i ferâi a passin e lu dismentein, al pense. Ma cuant che al olme la scrite blancje su la flancade scure, il cûr i sburte un grop sù pal cuel e i stude il flât.
No puedin vêlu viodût. Al è vistût a neri, tal neri, ancje se prime al jere sot des lûs de place.
Invezit il motôr si ferme: dôs stelis rossis a sflandorin tal mieç de strade, si studin e si impiin altris dôs blancjis che a scomencin a vignî viers di lui.