La Conte dal Mês di Fevrâr

O sin ai sedis e il cont par ledrôs a man drete al va disgotant i siei ultins minûts… la scjadince che si sin dâts pe Conte dal Mês e je cuasi rivade insom. E nô cemût sino? Cuasi a bon!

L’Ostîr al à rivât adore a scrivi la conte e ancje se al varès di dâji une ultime lete, al spere di vêus contât une biele storie. Nol vûl però spiâus di plui. La Coghe e à scrivût un toconon che us insegnarà une vore di robis che no savês sul argoment dal mês. Cumò al mancje l’ultin lavôr de Sartore, che puarete i tocje fâ i straordenaris ancje a jê a meti adun il file di mandâus, smanetant su la part grafiche e informatiche de robe. Ma o sperìn di faiâle e rivâ adore a mantignî la nestre promesse di regalâus une conte e un articul di cualitât ancje par il mês di Fevrâr. Nus savarês a dî.

Nôaltris, par gjoldi al miôr il nestri regâl, o permetarìn di scjamâ la conte sedi in formât pdf, di stampâ o lei sul PC, sedi in formât epub, di podê meti suntun ereader o di podê lei sul telefonut scjamant un cualsisei letôr par epub di rive jù (nô, par esempli, o vin doprât Moon+ reader). Insome…

Par cumò, stant che a son lis ultimis oris, se magari no sês ancjemò iscrits te Liste di Contecurte, o se o vês voie di invidâ cualchidun a iscrivisi in extremis, us sticìn a fâlu fasint lei cemût che e scomence la conte, che si intitule…

LEN

Par tignîsi sù a metin lis mans dentri te tiere. Lis mans e ancjemò i braçs. Al reste fûr dome cualchi comedon. E no ‘nd àn dome dôs, come me, ma di plui. E dutis plenis di dêts. Luncs. Che però no si viodin. Ma jo o sai che a son. Jo une volte ju ai viodûts. Par chel o sai che al è dificil fâju colâ. Se tu ju sburtis no tu rivis nancje a spostâju. Il cjâf no sai dulà che al è. Forsit no lu àn. I pîts ju tegnin par aiar. Sui pîts ur cressin lis fueis. Verdis. Ma no simpri dal stes vert. Cualchidune cuasi blancje. Altris scuris come la aghe fonde de Tor. Cumò però no son. A son ladis vie. A son restâts ducj discolçs. O pûr a son chês chi, par tiere. O cîr di no cjaminâi parsore. A son tantis. Cussì tantis che no pues fâ di mancul di scomençâ a contâlis. Lis conti trê par volte. Un, doi, trê. O torni simpri a scomençâ. Un, doi trê. Un, doi trê. Un, doi trê. Jo mi concentri, ma dopo, une man mi tire vie prin che o vedi finît. No savarai mai tropis che a son.

1 comment