E se us regalassin…

… une conte al mês?

Sì, sì, lu savìn. La nestre Ostarie e regale contis ogni setemane, ma us vin anticipât tal nestri post galatic che o vin voie di dâsi da fâ, chest an, e o pensin che al sedi ben fâ ancje cualchi operazion di marcjât par tirâ dongje letôrs. Sì, o vin dite propite letôrs, che se no fossin chei, al è clâr, no coventaressin nancje i contecurtârs! E no o sin une Ostarie che come prodot di fonde e à propite la conte curte e nus fâs plasê soredut che si vegni a lei contis curtis in lenghe furlane. Par chel i tignîn ai nestris clients e o vin voie di premiâju.

Si che duncje, ce vino pensât?

Une idee che e je vignude al Ostîr e a la Sartore dentri des cjacaris che si fasin par mandâ indevant la barache. Pensant a la conte di Nadâl che e jere plui lungje dal solit e che si podeve lei par intîr dome su la Patrie dal Friûl, si sin dits: Ma parcè no regalâle a chei che a ricevin i inzornaments de ostarie vie mail? E di li la robe nus à cjapât la man e o sin rivâts adiriture a tornâ a meti a puest dut il sisteme comunicatîf de ostarie vie mail. Po dopo l’Ostîr al à clamât la Coghe, si è fat dâ i miôr ingredients e al à tacât a… scrivi une altre conte!
Parcèèè? Ma al è clâr! O vin voie di regalâ simpri robe gnove!

A man drete o cjatais il spazi dulà podê inserî il vuestri non e la vuestre direzion di pueste eletroniche e par podê ricevi un messaç ogni setemane che us vise dai inzornaments la ostarie. Par cui che nus lei sul telefonut, baste scori un pôc plui sot di chest articul, là che al è scrit Corinus daûr vie email.
E voaltris o disarês: Eh, ma tant jo o torzeoni simpri par internet e lu lei alì… 
Benon! Ma vûstu meti ce comoditât che ti rivi za dut te cassele de pueste?

E no je finide chi, la robe. A ducj chei che a saràn iscrits ae nestre liste, ven a stâi clients afezionâts, l’Ostîr ur mandarà une conte di rive jù che no sarà publicade sul sît e che sarà inviade dome a chei di liste. Une conte che e cirarà di jessi moderne, ma furlane, e cjapâ dentri ancje i ingredients che la nestre Coghe e à metût dongje par che l’Ostîr la prepari, contant di cualchi event o tradizion di chêl mês. E dut chest metût dongje intun comût pdf che us vignarà mandât personalmentri dal ostîr.

La conte dal mês di Zenâr e je proviodude par il 16, (doman di sere!) date che e je il complean de nestre ostarie e che o cjatìn perfete par fâus chest prin regâl. Ostîr, Coghe e Sartore a stan lavorant come dai mus par prontâ dut par doman di sere (sì, lu savìn che l’ostîr al è mus ancje se nol lavore).
A voaltris, par podê vê la Conte dal Mês a partî de prime, no us reste che inserî la vuestre direzion di pueste e dopo confermâ il messaç che us rivarà te pueste eletroniche!

Svelts!

2 comments On E se us regalassin…

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît