Contecurte a Dicembar

E nie… Chei di Contecurte ancjemò no si decidin a polsâ.

O vin rivât a fâ zuiâ di cjartis lis striis, che cu lis lôr contis a àn inmagât la int li dal Mulin di Flambri, no vûstu che a rivedin a fâ zuiâ cu lis cjarticontis – perdon, cjartisantis –  ancje cualchi Sant? O almancul noaltris i provarin, nuiemancul che te fieste di Sante Lussie, Domenie di sere, ai 8, a Glemone.

Come par solit, no si contentin di vignî a lei lis contis – nestris e di cualchi contecurtâr – ma o cirin di meti adun un piçul spetacul, come simpri cun gust di gjolti ma ancje di pensâ. Insome… di sparniça la narative furlane curte, puartantle ator par lis sagris e li placis, come che oramai a fasin simpri plui di spes. Nus dâ il bon acet la Fieste di Sante Lussie, e noaltris cuissà chest colp ce che si sin inventâts… Insome, se o sês di chês bandis, o us va di fâ un zirut, nus cjatais cuasi ducj, Ostîr, famei, sartore, coghe, berlon, massarie e parfin il cramâr, che torzeon come simpri, par lis fiestis si è dât dongje a la Patrie. Cuissà cui che a saràn i sants che a vignaran a zuiâ? E ce storiis che a contaran… E dopo, come simpri, un biel tai insieme, come che si convent a chei de osterie.

Ve chi la  pagjine fb di Contecurte par tignîsi inzornâts e cjalâ lis diretis e ve chi l’event fb di condividi par invidâ ducj chei che o podês.

1 comment