Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
Premi Scerbanenco Lignano Noir
Stant che Rafaêl al è vie fûr de Patrie, o cjapi la peraule jo, la Sartore de ostarie. Se o vês viodût il TGR di orsere o varês di sigûr za savude la bielissime gnove: il nestri ostîr al à vinçût il Premi Scerbanenco Lignano Noir 2019!
Nô de ostarie o jerin za in agjitazion parcè che la sô conte “Sul Tagliamento” e je stade publicade dal Messaggero Veneto insieme a lis altris dôs rivadis in finâl: “La saracinesca abbassata” di Silvia Monego-Tazzari, e “Tracce di sangue sul lavatoio” di Giuseppe Mariuz. Duncje si saveve che la conte e jere in finâl, ma no si saveve ancjemò cui che al jere il vincidôr…
Un cadavar di un nordafrican al è stât cjatât tes gravis dal Tiliment, però no si trate di un incident: l’om nol è muart inneât, ma copât di une curtissade… “Sul Tagliamento” e scomence cuntune investigazion une vore dificile, ma e va indevant in maniere inspietade, cuntun finâl a sorprese che al è stât preseât di ducj i zurâts.
La premiazion e je stade îr a Lignan cu la presince dal scritôr Carlo Lucarelli e di Cecilia Scerbanenco, fie di Giorgio Scerbanenco, il grandissim scritôr di zâi e noir (e ancje di bielissimis contis curtis) che al à passât i ultins agns de sô vite propit a Lignan.
Il Premi Scerbanenco al è inmaneât dal Comun di Lignan par ricuardâ il scritôr, insieme a lis fiis Cecilia e Germana e in colaborazion cul Messaggero Veneto e Giallo Mondadori. Te jurie che e à sielt il vincidôr a jerin Franco Forte (diretôr editoriâl de “Il Giallo Mondadori”), Oscar d’Agostino (gjornalist dal Messaggero Veneto), Elvio Guagnini (docent emerit de Universitât di Triest), Piergiorgio Nicolazzini (agjent leterari), Cecilia Scerbanenco (consulente editoriâl) e Nicoletta Talon (bibliotecarie). La conte vincidore e sarà publicade ta un volum de golaine Giallo Mondadori.
E o vin ancjemò une sorprese: tal servizi lât in onde sul TG regjonâl no si fevele dome di Raffaele e de premiazion, ma e je stade nomenade ancje la nestre ostarie! A chest link si pues viodi il video www.rainews.it/tgr/fvg/video/2019/08/fvg-Premio-Scerbanenco-fd46a34a-1428-4d36-a825-87ed37101519.html
Sul sît dal Messaggero Veneto si pues lei la conte di Raffaele ta cheste pagjine: messaggeroveneto.gelocal.it/tempo-libero/2019/08/31/news/omicidio-sul-tagliamento-1.37399746
Nô i fasin grandissims compliments a l’ostîr pal premi ben meretât e lu spietin par fâ fieste cun lui in ostarie!
scrit de Sartore de ostarie
4 comments
Lasse une rispueste
Dutis lis contis
Compliments di cûr al nestri ostîr. Bulo come simpri.
Il nestri ostîr nol dismet mai di maraveânus; cul prin premi al concors “Scerbanenco” di Lignan al à pandût une volte di plui che al è di coce fine e vonde.
Compliments ancje di bande me.
Compliments!
Compliments e onôr al nestri ustîr, che al à savût imbutilia lis aghis dal tiliment convertintles in un vin di preseade fature, dant lustri e gjonde a le nestre amade ostarie, cumò si che al è di fa cjoche inte cantine dal gjestôr. Lussian