La Briscule des Striis

E no vino di sierâlu ben, chest an di Contecurte?

O vin finît 10 agns, o vin fat un super Contecurte day, o vin tignût vîf il sît cun contis ogni setemane e insome, o disaressin propite che al sarès biel meti adun une serade dute nestre, par il gust di fâ alc, metude adun dai vuestrîs fidâts daûr dal bancon de Ostarie.

Si che duncje, domenie 15, o vin rivât a domandâ e vê, in gracie de poie dal Comun di Talmassons, un puest bielissim e magjic, il Mulin vieri di Tilio, o miôr, il Mulin Braide, pene fûr Flambri, propit li dal biotopo. E cumò, stant che o vin vût cheste bielissime biciclete, nus tocje pedalâ, e meti adun un biel spetacul di contis.

No savìn ce che al sucedarà, no savìn se a vignaràn pardabon lis striis a zuiâ di cjartis, ma di sigure a vignaran a lei e contâ storiis. E se no vegnin lôr, us a li contarin noaltris. Se propite no vês voie di sintîlis, podês simpri vignî e lâ a fâ une cjaminade par i bielissims trois dal biotop, o pûr zontâsi par il ghiringhel finâl, che lu savês ben, intune ostarie no si à di lassâsi come cjans. Si che duncje, visait ducj, contecurtârs e amîs dai contecurtârs, che aes 6 sot sere, dentri o fûr dal mulin, a seconde dal timp, no si pues mancjâ ae Briscule des Striis. No o vin za visât sbilfs e guriuts, nanui e aganis, e nus àn za dite che a vegnin, ancje se si sa che al è dificil viodiju.

Ve chi l’event facebook di plasê e condividi

Us spietìn!