Un concors par contecurtârs!

Alore, contecurtârs e contecurtaris,

Al sucêt che vuê nuie conte, ma us contin di un concors! Sì, parcè che al è inutil menâle tant cu lis contis, e dopo magari cuant che nus metin adun un concors leterari fat di pueste par noaltris, magari a fasìn i snob o pûr neancje no vignìn a savêlu.

E alore, a mancjin pôcs dîs ae scjadince de seconde edizion dal concors leterari “Vôs de basse” che al è un concors di narative furlane nuiemancul che pe robe che nus plâs di plui a noaltris: lis contis curtis par furlan.

Ven a stâi che insome, i contecurtârs a varessin di partecipâ in bloc al concors, e magari jessi in câs di cjatâsi ae premiazion, che e je simpri une biele ocasion par viodis e magari bevi un tai e cjalâsi in muse. Si che duncje, se za no vês scrit e mandât, niçaisi! Al è il vuestri Ostîr che us invide a dâ vôs a lis contis par furlan.

Il concors al è inmaneât dai Comuns di Cjarlins, Gonârs, Muçane, Porpêt, Prissinins e San Zorç di Noiâr, midiant dal sportel associât pe lenghe furlane, cul patrocini de Societât Filologjiche Furlane e de Cooperative Informazione Friulana/Radio Onde Furlane.

Tant che l’an passât, il concors al è dividût in trê sezions: Narative, Poesie e Students, risiervade ai fantats des scuelis secondariis di prin o secont grât. La partecipazion e je sore nuie e i vincidôrs a ricevaran tant che premi un bon di podê spindi par comprâ libris. I lavôrs a varan di rivâ, intune buste sierade e segnade cuntun sproc, li dal ufici protocol dal Comun di San Zorç di Noiâr dentri di misdì e mieç di vinars ai 28 di Dicembar dal 2018. Lis premiazions si fasaran vie pal mês di Zenâr dal 2019.

In ogni câs o podês cjatâ dutis lis informazions sul sît de filologjiche o dai Comuns che lu àn inmaneât. E a podês lei lis contis che a a àn vinçût l’an passât propite achì su la osterie. E nuie… Partecipait! Il vuestri Ostîr al garantìs personalmentri su la bontât dal concors, de jurie e sul fat che al è impuartant, ta chestis iniziativis, fâ viodi che si è, e jessi in tancj, cence abadâ ae competizion, Se un al à voie di fâ alc pe leterature de nestre lenghe, al è propite partecipant a chestis piçulis iniziatis che si scomence.

Vie! A scrivi!