Ve chi… e sta par scomençâ la setemane dal Contecurte Day, e no de Ostarie o vin pensât ben di cjapâ dentri dut il fin setemane par sparniçâ il verp de Ostarie: lis storiis curtis! E alore:
Si tache joibe di sere, aes sîs sot sere, li de biblioteche plui furlane di Tavagnà, a Felet, cu la rassegne leterarie “Un tè con l’autore” che jessint in plene setemane de culture furlane e deventarà “Un tai cul autôr” (o stin scherçant, al reste te, ma cence acient) e a viodarà nuiemancul che il nestri Ostîr a presentà “CONTIS SOT SPIRT”, il lavôr di contis curtis che al à vinçût l’ultin San Simon e che al met dongje personaçs innomenâts de culture e storie furlane e contis curtis di gjenars diferents, fintremai a tirâ fûr un libri di narative bon par lis scuelis.
E cundiplui, a fâi domandis tristis al autôr al sarà il so fidât famei Checo Tam, e a viodi se il libri al è plasût a saràn lis leturis dai arlêfs dal cors di furlan che al siere propit cun chiste lezion vierte. Ve chi la locandine:
E ve chi ancje l’event fb se o vês il plasê di condividi e invidâ int, dulà che in curt forsit l’ostîr al fasarà publicâ une idee di cuviertine alternative dal libri :).
Invezit, Vinars, ai 10 di Mai, li dal Otagono di Codroip, lant a Jutiz, par cui che nol è podût vignî ae serade di Sclaunic, che ve che o tornin a fâ UN SPETACUL DI CONTIS! il format di narative pene inventât di contecurte par meti in mostre lis contis di famee dal nestri Ostîr e gjoldisi une serade di musiche cu la clape di chei di Contecurte.
Ve chi che us lassin la locandine cun ducj i apontaments de iniziative che e à chê di cjapâ sù un franc par cui che al à vût cualchi sfortune in plui.
E ae fin, Domenie ai 13 di Mai, in Vile Manin, aes 15.00, inte stanzie in bande pene jentrâts in Vile, l’event che aromai ogni an nus tire dongje di plui, noaltris contecurtârs: IL CONTECURTE DAY!
Lis contis a son rivadis e anzit, forsit forsit al è restât un puestut…
Noaltris o stin lavorant a meti adun il spetacul e a meti in gare 12 contis che il public al sielzarâ par savê cui che al sarà il Re o la Regjine di contecurtis dal 2018.
No us disìn altri: us lassìn la locandine pene jessude de Filologjiche che nus patrocine l’event e us invidin ducj a mandâ ator la gnove.
Ve chi il sît de setemane dulà che o cjatais dut… ma sul Contecurte day, in curt cualchi gnove in plui.
E par cumò al è dut. Us domandìn scuse par la presse, ma o sin propit indafarâts a mateâ cun ducj chescj events!
