Un spetacul di contis e…

Mandi Contecurtârs!
L’Ostîr, come chei plui innomenâts, al è jessût cul gnûf libri di contis e al à tacât nuiemancul che la tournee di prensentazions, ma o savês che a lui lis presentazions no i plasin plui di tant e al à miôr meti adun spetacui.
Dopo i strepitôs sucès des seradis di Udin e Cjarlins, insieme cui doi amîs di mirindis Checo e Gianfranco, vechi che al vierç la presentazion di Altris contis di famee metint adun un spetacul a cjase sô, inte maraveose cornîs de Sale de Canoniche a Sclaunic, vinars ai 27 di Avrîl.
I doi libris dediâs aes contis di famee, sedi chel vieri che chel gnûf, a vignaràn doprârs par meti insieme un spetacul fat di leturis senichis, di cualchi cjacare tal mieç e di un pocje di musiche, cuntun biel ghiringhel ae fin par gjoldi inplen de serade in pûr spirt di Contecurte.
Ben nomo?
O almancul… ben o mal che al ledi, a saràn in ogni câs… un spetacul di contis!
A dâi une man al nestri Ostîr, il circul Culturâl La Pipinate di Sclaunic, dopo il sucès de presentazion di doi agns fa al torne a inmaneâ chest piçul spetacul. In bande di lui, fedêi o obleâts no si sa, il famei Checo Tam, il berlon Michêl Londar, la massarie Margarite Cogôi, il cjantôr Bizio Citos e il poete Franco Polentarutti… insome… cuasi dute la ostarie!
Come par solit la jentrade je libare, si pues cjatâ a vendi il libri gnûf dal Ostîr, e ancje chel vecjo, e cuissà che nol sedi ispirât e e saltedi fûr une conte curte inedite di scoltâ dome in cheste ocasion.
Achì cjatais l’event fb di sparniçâ, e achì la pagjine de Ostarie par stâ daûr a lis altris seradis.
Eh sì, parcè che no je finide chi.
Su visin che dopo dal 27 a saràn une schirie di altris apontaments une vore impuartants.
Par cumò us visìn che:
il 10 di Mai l’Ostîr al sarà a presentâ il libri li de Biblioteche di Felet,
ai 11 di Mai tigneisi libars di vignî a Codroip a sintî un altri spetacul
ai 13 di Mai, tal daspòmisdì, ducj a Vile Manin par il Contecurte Day! 
E no je finide achì,
O vin pensât che e je vignude la ore di fâ une sielte, pe nestre Ostarie, che par cumò la cjatais achì, ospitade jenfri i blogs dal Ostîr inte suaze di rive jù di blogspot.
Ben po… o varessin voie di vierzi un sît, e o vin cjatât cui che nus dâ une man a spostâ dut su worpress, cumò che al è par furlan. Ma no si à di lavorâ a gratis, e alore, in maniere nestre, o fasarìn un crowdfounding furlan, ven a stâi che intes seradis che a vignarân al sarà simpri un purcitut musine par meti dentri un franc di podê paiâ un sît par contecurte, che almancul cussì no vin pôre di pierdi dut o di viodi lis nestris contis vendudis a chei di Cambridge Analytica 🙂

3 coments On Un spetacul di contis e…

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît