CONTECURTE DAY 2018
Ce vitis!
E je rivade chê ore, Contecurtârs!
E je rivade la ore di scrivi une siore conte, par l’event di gale che aromai di doi agns o metin adun cu la clape di Chei di Contecurte. Tal 2016 o jerin a Listize, l’an passât a Flambri e chest an o vin za une date, intal daspòmisdì dai 13 di Mai e cuissà… forsit a Passarian?
Ma nol è il puest, la novitât dal
Contecurte Day 2018!
La novitât e je la poie de Societât Filologjiche Furlane, che e sarà la preseadissime Santule dal event plui spietât dal an, pe nestre Ostarie.
E alore? E alore e je ore di metisi a scrivi!
La formule e je la solite de sfide di contis e lis regulis a son chês dal an passât.
12 contis in gare, 12 puescj di vuadagnâ intal tabelon des contis, che i nestris letôrs a ciraran di purtâ in finâl e di fâ vinci.
Il limit al è simpri chel: 2000 batudis comprendûts i spazis, cence tolerance.
Come par solit, al sarà il public presint a votâ la conte che e rivarà insom e a decretâ il vincidôr de disfide, e visaitsi che in gare e je la conte, e no l’autôr, e par chest us racomandìn di no disvelâ a di nissun cuale che e je la vuestre conte. L’ostîr al varès di jessi il sôl a savê cui che al à scrit ce.
E si che no sin contents, chest an o vin ancje un teme di rispietâ, che o vês viodût za tal titul dal event. La conte e à di jessi inspirade a la biografie di un furlan pôc cognossût, un furlan di chei ledrôs, di chei che no ju cognòs nissun ma che a àn fat robis che al vâl la pene di contâ (ma a van benissim ancje chei cognossûts tant di pôcs e pôc di tancj).
Si pues contâ la vite, o un fat di cheste, si pues contâ di lôr o meti in forme di conte un moment impuartant o ancje dome biel di contâ. Ducj i gjenârs a son acietâts e anzit, meteit man ae fantasie e no stêt vê premure. Se no vîs man cu la lenghe scrite ma o vês voie di partecipâ, o savês che podês comedâ la conte insieme al Ostîr. O vin voie di regalâ, in bande di un moment di leterature, cualchi curiositât su la vite di furlans che nol cognòs nissun o che cognossin in pôcs.
E in bande de conte, propit par chest, cuntun limit di 1000 batudis, bisugne inviâ ancje un struc de biografie dal personaç che o vês tratât inte conte.
O podês cjapâ ispirazion, come che al à fat l’Ostîr, se no ’nt vês, da dizionari biografic dai furlans o di cualsisei altre font.
No je premure, ma i puescj a son 12 e la sielte des contis, se ’nt rivin di plui, e sarà sot il judizi dal Ostîr e dai siei fidâts colaboradôrs. La scjadince par mandâ lis contis ae solite mail de ostarie intun file editabil e je chê dal 25 di Avrîl, e dome dopo di chê date us comunicarin la liste dai 12 partecipants.
Al è dut, nus somee.
Domandait se us covente intai coments a chest post e sparniçait l’event dapardut.
E plaseit la pagjine fb par restâ inzornâts
Us spietìn ducj!
E cuissà che par chest an no vedin ancje un siôr premi, che us disarìn in curt.
