Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
’68 Demokratic Happening
Parafrasi par une poesie ancjemò di scrivi… in zonte
a Federico Tavan,
dulà che al è,
se al pues magari cumbinâ…
O sin culì, stafarîts su lis nestris poltronis, a scrivi contis. Cheste no je une conte. E je la croniche imagjinarie di une comemorazion. Il cincuantenari dal ’68. In teatri, tal tinel de citât.
O soi sigûr che in prime file, un dongje chel altri, ducj passâts pal ’68, a son sentâts un sindicalist, un dirigjent, un informatic, un politic, il diretôr dal teatri.
O soi sigûr che il sindicalist al pense a lis concuistis e ai progrès fats vie pai agns dopo di chel mai lontan, e ju ricuardarà ducj tal so discors, lassant cuiet daûr di une plee platade dai resonaments, il fat di lavorâ tune fabriche che e bute fûr components par missii intercontinentâi.
O soi sigûr che il dirigjent al pense cemût fâ fûr i centris di podê internis che la direzion de sô aziende i à domandât di cambiâ, dantjur dentri fintremai a distruzi ducj chei che a fasin cuintri al cambiament, ma cirint di no fâ capî che il podê che si vûl cambiâ al è chel che al sta te capacitât, concuistade di chei che a lavorin – i privilegjâts, aromai – di rapresentâsi e fâ contratazions in maniere coletive, no dome suntun plan individuâl.
O soi sigûr che l’informatic al crôt di sedi il plui inteligjent di ducj e pardabon al pense, tant che un ragn fanicul, cemût slargjâ la sô tele in fibre otiche fin tai çondars plui scosagns des monts, par disviâ ancje i riui di aur di lenti sù, viers il mâr grant de Californie.
O soi sigûr che il politic, a pene jessût des sgrifis di un partît nassût muart, al è convint che si vîf cumò intun timp post ideologjic, e che partant no puedin plui esisti ideologjiis. Narcîs come che al è, nol rive a scoltâ il rivoc dal dubi che propit ancje cheste convinzion e sedi par se stesse une ideologjie, anzit, la grant mari di dutis lis ideologjiis.
O soi sigûr che il diretôr dal teatri al scolte ducj cun atenzion. Cul cjâf al fâs di sì e al cjale la sale plene, si nete il cjanton de bocje di un fruçon di brocul restât de cene e al pense di vê sfrutât te maniere juste un prodot teatrâl che al rint. E za si figure ce che al podarà fâ ca di nûf agns, pal cincuantenari dal ’77.
O soi sigûr che ducj a son in spiete che al ledi sù il sipari e che la musiche e scomenci. Intant il ricuart comun dai bancs doplis di len, intassâts daûr de puarte di ingrès dal liceu ocupât, ur fâs vignî vaiulints i voi.
E a ridin. E il teatri al rît. E ducj a ridin.
E la demokrazie, sparniçade di scuindon tes maiis de fibre otiche che e fâs scori vite digjitalizade cjapade tal visc eletromagnetic dal aiar, come simpri e rît.
No à plui nissune bisugne ni di fâ ni di fâ fâ BUM.
I baste un LIKE.
di Gianfranco Pellegrini
#727
1 comment
Lasse une rispueste
Dutis lis contis
O lassin, in chest prin coment, la poesie di Federico Tavan, Bum, che e je dificile e no si cjate in rêt, ma che al è un plasê leile, e che je strente ae conte. Vele chi:
Bum
di Federico Tavan
Nô inclaudatz
uchì
a scrive poesies.
E soi sigûr
che chista
e n’eis poesia.
Eis la storia de un treno.
E soi sigûr
che su chiel treno
al era
un barbon
un emigrant
un operaiu
una studentessa
un pare de famea…
E soi sigûr
che al barbon
al à la mê etât
cença dincj cença ciavei
e al rît e al vai
e a nol va da nissuna banda
e nol à nissuna valîs.
E soi sigûr
che l’emigrant
al à cincuantatrè ans
e al ven da la Gjermania.
E soi sigûr
ch’al va in Sicilia
e inta la valîs
na stecja de cjicolata.
E soi sigûr
che l’operaiu
al lavora a l’Alfaromeo.
E soi sigûr
ch’al à coratadoi ans,
inta la valîs
l’ultima paa.
E soi sigûr
che la studentessa
eis mitant biela
e à disissiet ans.
E soi sigûr
ch’a va a jode Roma;
inta la valîs
na machina fotografica.
E soi sigûr che al pare de famea
al à i ocjai sessantadoi ans
un nevout a Bari
e inta la valîs
“la cena per i suoi rondinini”.
E soi sigûr
che i stan spietant alc
e i rît
e al treno al rît
e li valîs i rît
e la democrazia
platada sot i binarius
come sempre
a rît.
BUM
e par sintile cjantade, us lassìn ancje la cjançon dai Bande Tzingare
https://www.youtube.com/watch?v=oI-NQkfqpgw
E un grassie a Gianfranco par vênus fat meti chest coment, che al è une buine ocasion par tornâ a lei la conte.