Contecurte day 2017 – invît

E je ore! Sin daûr a inmaneâ il Contecurte day dal 2017.

Nol è inmò nuie di sigûr, ma disin cussì, il mês al podarès jessi chel di Avrîl, magari ai prins…

Il puest al podarès jessi disìn tor Flambri, o jù par li…

Lis contis in gare a podaressin jessi 12, ma forsit ancje 15. No di plui.

Chei che a scrivin su contecurte, i contecurtârs doc, a àn vût za il lôr puest e un pre invît, e plui di cualchidun lu à za acjetât. Ma al è ancjemò puest par partecipâ al event!

Cemût si ae di fâ? Ma bisugne scrivi une conte, ve!

Une conte che e à di jessi mandade a Contecurte dentri dal 31 di Març e e à di jessi inedite e che dome l’autôr le cognòs, parcè che in gare nol sarà l’autôr, ma dome la sô conte. Ven a stâi che no cui che al à scrîf al à di leile dome lui. Lui e l’ostîr, al è clâr, che al sarà l’unic – si spere – a savê cui che al à scrit lis contis in gare e no lu disarà nenajce a chei di contecurte, che a varàn il compit di meti in sene lis contis. Il gjenar al è libar, al è clâr, e par cui che al vûl lei lis contis di l’an passât nol à che di fracâ il tag “contecurteday”.

Cun di plui, la conte no à di superâ lis 2000 batudis e chest limit, par esigjencis di leture e di gare, al è tassatîf. (come lis regulis de ostarie, insome).

E po dopo, cuissà, magari si vinçaràn premis, magari si larà a cene ducj insieme, magari no si fasarà nuie e fasarìn il contecurte day a cjase dal Ostîr 🙂

Ma voaltris là di fûr,  provait a partecipâ… la prime sfide e je chê di jessi dentri dai partecipants ae sfide!

E condivideit su fb, o vie mail a ducj chei che volês…

Par un conte curte in plui, si cjate simpri un puest.