Il destin

1960
–  Pai, al mi à domandade!
E je su la puarte de stale, la frutate. I voi i ridin sicu che a ridin i voi des fantatis inamoradis, baste viodile.
– Ce aio di dî?
– Ce astu di dî? Dîi che al vegni dentri. In cjase.
Vito al è daûr a prontâ i vencs par cuinçâ lis vîts. Al reste cuntun macut in man e al cjale lis sôs vacjis cence viodilis. Alore e je rivade chê ore? Chê ore che e veve ben di rivâ, al saveve che al veve di vignî chel che al varès puartade vie la sô frute… Però cumò che chê ore e je li…

1938
Sul alt de glesie il plevan al spiete, cun cuatri zagos ator di sé: trê granduts e un picinin che nol à nancje sîs agns, cul çuf par traviers e cu la gabane che e strissine intal polvar. Velu che al rive il corteu cu la cassute blancje de zimulute muarte, puare ninine, no je à fate! E cuissà se sô sûr…

1960
In cjase Vito i da un cjalon a chel fantat spilunghet e cence dî nuie al va dret a sgarfâ inte vitrine, intune cjicare dal servizi che ur vevin regalât a lui e a Mariute cuant che a si vevin sposâts. Al tire fûr une palanche, une palanche di chês di une volte, dîs centesims di prime de vuere.
– Ce astu non?-  i domande al zovin.

1938
Intal cimiteri, finît l’ultim De profundis, Vito, il pari des zimulis, al clame dongje i zagos e ur slungje une palanche di dîs centesims par om, ancje al plui piçul.
Il frut al cjale la palanche, par dret e par ledros, le smalfìe, le cjarece. Mai vude in man une palanche! Al à za tacât cui progjets: un sacut di caramelis? Un gjelato? Un zîr su la gjostre cuant che al ven chê dì dal perdon? O ben un avion grant come chel che al à viodût suntun gjornâl, lì dal barbîr? Uhm! Salacor no je vonde cheste palanche. Ma la cariere di zago e promet ben par chel frutin cul çuf par traviers: la zimule muarte i à puartât la prime di tantis palanchis….
– Sperìn che e mueri ancje chê altre zimule!
Vito al à sintût l’avôt dal frut. No cate il cûr sglonf nol à podût fâ di mancul di une smorfie che si podeve ancje cjapâle par une muse di ridi.
– Ce astu non? – i domande al frut.
– Lussian –  al rispuint il frut intal 1938.

1960
– Lussian – al rispuint il zovin intal 1960.
– Viodistu, cheste palanche e jere pronte par te, za fa 22 agns, che tant tu le bramavis. In chê volte le ai sparagnade, mi le à fate sparagnâ chê culì, cheste frute, che, par spietâti te, no à volût murî.

di Laurin Zuan Nardin
#1***