CorseCurteSetembar#08 – Imprescj di pâs, imprescj di vuere

#08 – Imprescj di pâs, imprescj di vuere

Denêl Antoniins al cjalave par la ultime volte il so canocjâl. Chel che i jere stât prestât dal so mestri, Galileo Galilei. Al pensave cun nostalgjie ai siei studis a Padue, a lis letaris che si veve scambiât cul so mestri e ae promesse che i veve fat, finide la vuere, di fâi vê un incaric in Toscane par podê puartâ indenant i siei studis.
Al varès podût dedicâsi a plen a la ricercje sientifiche e, un doman, parfin deventâ l’erêt dal so mestri come sienziât. Ma cumò i tocje meti in bande i imprescj dai siei studis: il canocjâl, lis cjartis, i libris, i conts. Cumò a i tocje tirâ fûr altris imprescj, chei di vuere: la sô corace e il so elmet, la spade e, ae fin, lis armis plui impuartantis: il so arcabûs e lis sôs pistolis, ducj cun il mecanisim di fûc a ruede. Secont une antighe tradizion al fo Leonart a inventâ chel sisteme in tal Cinccent, propit cuant che al fo clamât dai venezians par studiâ un mût di rinfuarçâ lis difesis di Grediscje. Invezit cumò Denêl al à di lâ cuintri Grediscje, adun cui Cavalîrs cun Arcabûs de Patrie dal Friûl e al spere dome che e finedi prest.
Cuant che al sarâ deventât un sienziât impuartant come Galilei al fasarà in mût che ancje la Academie dai Sturnîts, fondade a Udin di so fradi Alfons, e deventi un impuartant centri di ricercje. Il so dubi al è par cheste vuere: di fat, concuistant Gurize e Triest, Vignesie e rivarès a meti adun il Stato da Tera cun il Stato da Mar e cussì il Friûl al tornarès a jessi no plui une tiere di confin ma une tiere di mieç, come ai timps di Aquilee… ma che e sedi verementri cheste la maniere di fâlu? E Pauli Sarpi, che al è ancje di pari furlan, verementri al pense di fâ la pâs dome fasint prevalê une part su chês altris? Intant che al partìs al à un brut presintiment: che nol sarès plui tornât. Alore si vise che al à di tignî simpri cont dal imprestj plui impuartant: il cjâf. Pûr trop e sarà propit une bale di canon in tal cjâf a ruvinâ la vite e i siums dal zovin Denêl Antoniins.

di Luche Bagnarol (Diletant in Sbandament)
#1366

2 comments