CorseCurteJugn#05 – O tempora, o mores

#05 – O tempora, o mores

Catine e saveve di jessi di une biele fantate e cui zovins e jere usade a fâ il biel e brut timp.
Par un no veve mai un moment libar, cuntun altri e pierdeve oris cence costrut, cuntun altri invezit no i passave mai il timp e vie dilunc cun chestis nainis par no impegnâsi cun nissun.
So pari, in famee, al inveive tant che Ciceron, ma jê ridint e faseve spalutis: – Jo o soi Catine, pai, no Catiline.
Sô mari, però, no si dave pinsîr: – Puarte pazience – i diseve a l’om – cun chel just, no fasarà tant la lichignose.
Di fat cussì al è stât cuant che pe sagre di Mai, a sunâ la armoniche cu la bandete dal paîs dongje, al rivà Dolfo: subit pan dolç, ma dûr di crustâ pai dincj di Catine.
Jê, che ai apontaments e bateve la ore come un orloi svuizar, cun lui spes e vulintîr e stave un biel pôc a fâ di pâl, parcè che Dolfo al lave a timp dome cul so strument: mai une volte che al rivàs cence il cuart di ore universitari di ritart.
A Catine i vignive sù la fote, ancje se lui, chel ligjere, al saveve simpri cemût sunâiale par fâi passâ il music.
Ma dai vuê, dai doman, il drandran nol cambiave e Catine si faseve il fiât trist.
La facende, par tant che i doi si plasessin, e someave metisi mâl, alore la mari, no par nuie gjaline di chel altri secul, i disè: – Se la ande di Dolfo no ti poche, fâti furbe, fiute; cambie tatiche, fâs come me cun to pari. Vuelistu che al rivi in orari? Sempliç: dâi apontament un cuart di ore prin dal stabilît.
– Tu âs reson; provâ no coste nuie – Catine si batè la man sul cerneli e… dit e fat.
Di bot il morôs, cence savêlu, al spacave il minût tal rivâ e Catine, gnogne sodisfate, no cjapâ plui rabiadis.
Par fâle curte, cun buine pâs di ducj, i doi, dal moment che da “cosa nasce cosa”, dopo cualchi an a àn metût sù “casa”.

di Maghe Olstrele (Rosute Pelote)
#1287

3 comments