CorseCurteMai#22 – Tornant

#22 – Tornant

Il secondin lu sburtà cun malegracie viers la fin dal gatul nereôs. I siei voi a forin travanâts de lûs di une buinore che e prometeve di jessi ricuardade pes temperaduris fûr dal vade. Al fasè par parâsi cu lis mans, maraveantsi pal moviment aromai libar des manetis.
Daûr di lui, la puarte che lu veve glotût par tancj, masse agns, si sierà bot e sclop, lassantlu bessôl al so gnûf destin. La bugade di scjafoiaç i gjavà il flât, cussì come che il so cuarp, aromai usât ai landris de preson, si cjatà a pirlâ par vie dal incei.
Michêl si cjalà ator, spierdût. Al veve vût contât i minûts, lis oris, dîs intîrs, pûr di no pierdisi intal grîs de dismentie, ma ae fin, un veli di apatie lu veve involuçât fin a taponâlu de vite reâl. E cumò? Ce varessial  podût fâ daspò 20 agns? O jerino stâts di mancul?
Libar. Al jere libar. Passât il prin moment di straniament, Michêl al ve subit clâr ce che al veve di fâ. Emma. Emma lu spietave. Jê lu varès spietât par simpri. Al jere il moment di tornâ a cjase.
Si invià viers il paîs, sot di un soreli che al pareve condanâ ogni so pas. Al veve la bocje sute e la piel i brusave pe scjaldice. Daspò di oris che i somearin secui, al fo denant di une cjasute spierdude tal mieç dai cjamps.
Mil domandis si ingrumavin tai siei pinsîrs. Se jê i voleve ben, parcè no jerie mai vignude a cjatâlu? E parcè no vevie mai rispuindût aes letaris? E chel altri? Ce fin vevial fat?
Il cjalt al tacave a tucai sù pal cjâf e il gnervôs i veve fat madracâi i budiei pe panze. Cul carûl che i roseave il cerviel, si prontà a tucâ ae puarte. Si inacuarzè dome in chel de piastrele cui trê nons. Emma, chel altri e… Michêl. Cu lis tarlupulis tai voi e il dubi che si sfantave intune veretât, si invià viers il casot dai imprescj. Lenghis infogadis i si faserin sù intor cuant che al impià chê bave di licuit strucjât ator di dute la cjase. Cjase. Jal veve imprometût. Cumò, biadelore, a saressin tornâts a cjase. Ducj insiemi.

di Fuguline (Cjicechepicjedispicjelacite)
#1280

1 comment