CorseCurteFevrâr#07 – The return of the giant Hogweed

#07 – The return of the giant Hogweed

La frutine e seguìs la none pai cjamps a tirâ sù lidrichessis par sostentâ i cuninuts. O sin in Vierte e ator al è plen di rosutis. Veju li i “Voi de Madone”, di un biel blu e i pestelacs e lis margaritis. La none e insegne a la frutine ducj i nons di rosis e jerbis che a cressin intun grant prât stabil. Intun puintut di ciment grês si viodin i piçui ragnuts ros. Lis primis cisilis bielzà a svolin par aiar e prest a rivaran de Afriche ancje i maraveôs uciei biei verts, chei che par talian si clamin “Gruccioni”.
La infanzie e je un vêr paradîs.

I agns a son passâts.
Chê frutine e je cressude e no je plui tâl: cumò e va ator bessole par chê plane a contemplâ plantis e rosutis.
Di tant timp il prât stabil dongje de flumere al è deventât culture e lis culturis che a jerin une volte pôc lontan a àn lassât il puest a fabrichis e arlevaments di poleçs. Intun prât dai oms a zuin di vuere sparantsi balins.
E je int che e fâs “jogging” o e cjamine cun dôs bachetis.
Tancj arbui a son stâts taiâts dongje de flumere. Lis âfs a àn cualchi probleme a cjatâ lis rosis di visitâ.
Jê alc si è visade dai nons di plantis e rosis che a cressin e a cirin di fâsi larc tes culturis ma cuant che no ju sa e tire fûr il smartphone cun GOOGLE LENS. Tantis plantis a son gnovis e une volte non si lis viodeve.
Il smartphone… ve il sugjeridôr al puest de vecje none muarte cetancj agns prime. La nestre le pense ancjemò.
Voi de madone e pestelacs a cressin inmò in cualchi boschete che e à resistût al disboscament…
Di bot ve che la femine e viôt une plante enorme cu lis rosis blancjis. I va dongje e e sta par tocjâle cuant che un alc dentri di jê i sugjerìs di fermâsi. Alore e tire fûr Google lens e e fotografe la rose. GIANT HOGWEED, PANACE DI MANTEGAZZA, plante che se e ven tocjade e dopo si va tal soreli e provoche ustions gravis e si po ancje restâ pidimentâts.
Cui sa che nol sedi stât il spirt de none a fermâle. Se e ves tocjât chê plante…

di Checo Tam (Tapioca City)
#1182

2 comments