CorseCurte – Classifiche di Zenâr

E al è rivât il moment plui spietât: la classifiche e je chi sot, ma par interpretâle ben, a covente fâ un pocje di croniche!

Sì che… i ponts, come che o savês, a saltin fûr dopo vê metût dongje lis votazions de jurie (Franc-Pup-Serafin) cu lis eventuâls penalitâts (contis plui lungjis), i bonus (prin puest) e lis votazions dai letôrs (5+3 ponts). E come che o varês za capît, lis posizions a platin plui di cualchi pari merit e soredut cualchi distac che al somee alt, in ponts, ma che al jere une vore piçul intal punteç.

O podìn dî, par esempli, che lis dôs scuadris che a dominin la prime zornade, il Reâl Cocâl e la Cjicechepicjedispicjelacite, a son devant dai lôr inseguitôrs di un sbit! Il Borussia Dordul e il Volketitrai-Liga a son in pratiche cul flât sul cuel e la Copasse Blu e je stade sburtade dal popul fintremai tacade. E cussì al capite intune zone de mieze classifiche, dulà che intune grampe di ponts a si cjatin 5-6 posizions, e ancje inte zone basse. Insome… un motîf in plui che al mostre dôs robis.

La prime e je che une classifiche cetant lungje di concorints e permet recuperis maraveôs, ma ancje brutis coladis. Sì che duncje, cui che al è denant al à di stâ in vuaite e cui che al è daûr al sa che nuie al è pierdût!

La seconde robe e je che si pues cundute pâs jentrâ in gare a Fevrâr, stant che a son tancj ponts di podê vuadagnâ, soredut se i concorints a aumentin. Za cumò, che a son doi in plui, si pues vuadagnâ 27 ponts.

Altre robe che al è oportuni fâ savê, su lis votazions de zurie, e je chê che lis trê classifichis dai zurâts a metevin intai prins puescj, ben o mâl, simpri chês contis, ven a stâi che i criteris di valutazion a jerin vonde in linie. O podês viodi che lis contis ladis a finîle plui in jù, te part basse, a son chês che a jerin mancul dongje al format dal concors, ven a stâi “une conte” tal sens di storie.

E o podìn ancje dî, o almancul, l’Ostîr al à podût valutâ, che la zurie e je stade ben pesade.

Carli al è chel che al dâ di sigure un pocje di plui impuartance ae forme, al lessic, ae elegance de conte e de storie, restant magari plui inflessibil su lis falopis di grafie e sul furlan doprât. E in efiets, lu vin cjolt par chel.

Zuanluche al cjale un pôc di plui il nuclei naratîf, la idee, in bande de eficacie de storie. Al à, clare, un svicinâsi ae conte plui di scritôr. E in efiets, lu vin cjolt par chel.

Rafaêl, invezit, al è chel che us à rispuindût, e al valute lis contis cence anonimât e al è biel che al sedi cussì, stant che al sa ancje la fature e la volontât che e sta daûr, e al sa lis corezions che a son stadis fatis e un pocje de gjenesi de conte. E us tocje sopuartâlu cussì.

Insome… ae fin, nus somee che lis votazions de zurie, ancje se nissun dai trê al jere in acuardi cu la prime rivade, a sedin ben messedadis.

Pes Votazions dai Letôrs, al è une vore biel viodi che a son stâts une vore di vôts e cheste e je za une vitorie. E o sperìn che al sedi stât biel soredut lei lis contis, parcè che dute cheste naine des classifichis e je divertente, ma o vin gust che no si pierdi mai la idee di jessi intun zûc, ancje se competitîf.

Al è stât un pari merit ancje par i letôrs che a àn premiât la conte Mascaris, di Copasse Blu, e la conte Lis Mariutinis, di Nene Furlane, vere sorprese che e je rivade a recuperâ in extremis cuasi dutis lis sôs penalitâts. Menzions speciâls a van dadis però ae Stale Rosse di Scodevacje, al Acuari Cence Branchis e al Volketitrai-Liga, ancje lôr plasûts ae int.

E se o vin di dâ un pôc i numars, podin dî che la conte plui lungje e je stade chê dal Nene Furlane, cun 2573 batudis, la plui curte chê dal Boraite Falconete, che cu lis sôs 230 batudis in filastrocje al à onorât la gare no cate l’ultin puest (cence contâ il 0 de conte no presentade, clare). Lis batudis totâls des contis, in ogni câs, a son stadis 46605, cuntune medie di 1864,2 caratars. Cjalant lis mediis, al è curiôs viodi che il Borussia Dordul al à, in pratiche, la stesse medie des primis dôs, ma soredut un scart cuadratic une vore bas, dome di 1,15 (al è plasût a ducj inte stesse maniere). E simpri fevelant di scart (cuadratic) ve che lis contis cui scarts plui alts a son chê dal Scalembrut (9,87) e dal Passarute (7,64).

Ma vonde cjacaris! Chi sot o cjatais la classifiche de prime zornade. 

E cumò che o savês alc di plui, corsecurtârs, il teme di Fevrâr lu savês, daitsi da fâ!

Ps. inte bissebove di contis, pues jessi che o vedin falât cualchi non, o smenteât alc. Se al è capitât, visait.

Orpo… Stevin par smenteâsi il FantaCorseCurte. Clare che ognidun al à i ponts de conte che al à votât, ma no nus coste nuie viodi la classifiche ancje di chest! Vele chi!

1 comment