Il teme pe Corse Curte di Fevrâr

Zardin di campagne cun gjirasoi, G. Klimt, 1906, 

Di campagne, di zardin,

Di ducj i colôrs,

e formis, e sintiments,

di cjalâ, piturâ, semenâ, mangjâ, robâ, regalâ…

FLÔRS

O rosis, se si vûl,

stant che chês cu lis spinis par furlan

ju clamìn sclapons.

Flôrs parcè cun lôr e tuche la Vierte

parcè che a son i regâl cromatic dal butul

il scomençament de pome

parcè ognidun al à almancul un che i plâs.

FLÔRS

di Vierte e di Sierade,

di ogni stagjon dal an

di cjarte o di plastiche

in taule o in cimitieri

dissegnâts su cjarte di cuant che o sin canais

FLÔRS

tant che un simbul, di spes,

di caratars, di etâts o sintiments umans

declamâts dai poetis

rapresentâts dai pitôrs

amirâts tai nestris orts, e cjamps, e vâs e vistîts…

Insome FLÔRS

Chest al è il teme di Fevrâr 

pai concorints de Corse Curte.