Lets in Ostarie: Il coraç e la pôre

Il coraç e la pôre
di Vito Mancuso,
Pasian di Prât, 2021

CE LIBRI ISAL?
Un libri jessût intal 2021, inte traduzion par furlan di Bepi Agostinis, par cure dal Istitût Ladin Furlan ‘Pre Checo Placerean’. 142 paginis, cun doi preambui, cuatri cjapitui, une bibliografie e une tabele dai nons. Nol à presit di cuviertine.

MA CE ISAL DENTRI, DI PRECÎS?
Une riflession une vore documentade e profonde su doi dai sintiments plui frecuents intes nestris animis di oms e di feminis. Sintiments tant plui atuâi cumò, in chescj timps di pandemie, cuant che ducj o vin un pocje di pôre in plui dal solit e il nestri coraç no savìn ce fâ di lui.
E parie une riflession sul significât profont des peraulis che, plui a son antighis, plui a son penzis di valôr.

MA CUI SONO I AUTÔRS?
Vito Mancuso al è un filosof e teolic di grande innomime, professôr universitari (Milan, Padue) e ancje colaboratôr de Universitât dal Friûl (Master in meditazion e neurosiencis). Al à vût scrit plusôrs libris e al direç la golaine I Grandi Libri dello Spirito.
Bepi Agostinis, grant apassionât de culture furlane, al è stât la anime de iniziative par un teatri stabil furlan, nassût, in gracis soredut di lui, intal 2019. Al à curât trasmissions radio e al à colaborât cun Nico Pepe tant che so assistent in regjie. Al à vût scrit di storie de art e dal teatri in Friûl.

A CUI I PUEDIAL PLASÊ?
A cui che al vûl confrontâ lis sôs pôris e il so coraç cu la vision filosofiche e/o teologjiche di un savint, di un di chei che a àn let tancj di chei libris che, magari, a son rivâts tirâ dongje cualchi gote di savietât in plui di nô.
E ancje a cui che al à gole di viodi ce maniere che la lenghe furlane e pues sedi buine di esprimi ancje cantins di alt nivel speculatîf.

E SE O AI VOIE DI CJOILU?
Si pues provâ li dal Istitût in via Zorutti, 3 c/o Cjase Uarnèl, a S. Laurinç di Sedean, tel. 0432 821613. O ben scrivi a istitutladinfurlan@libero.it o visitâ il sît www.istituladinfurlan.it.