Agjendinis

Svualt al cjapà sù lis sôs vecjis agjendinis telefonichis e fasint il coridôr al le in cusine. E jere dute une cerimonie: lis poiave sore la taule, al meteve la moche sul gas, intant che cheste e finive di cisicâ molant fûr il so arome, Svualt cu la cjalade al cjarinave chês agjendinis. Al jere un mot che al veve fat grum  di voltis.

Di agjendinis ‘nd veve un slac, ogni an, tor fiestis, al comprave chê gnove, simpri cun cuviertinis di diferents colôrs, che dulinvie la sô vite lu vevin compagnât in cualsisei par di mont che si cjatàs. I plaseve riviodi di gnûf chei nons ancje di chês personis mai cognossudis, se jerin li par alc a jerin. Si cjapave simpri cualchi secont di timp prin di scomençâ a sfueâlis, al saveve bielzà i nons che a saressin aparîts. Intant che al cjarinave lis rigjidis cuviertinis, al beveve a cercis il so bon cafè. Dute la sô vite inmò al dì di vuê e continuave a scori in chês pagjinis, cence par nuie abadâ al pas dal timp.

Chê dì, si dedicà a sfueâ dome lis plui antighis. Finide la ultime, al sierà i voi… al pensà che bisugnave fâ alc. Al butà jù sore un sfuei un par di numars che za da timp nol saveve nuie dai lôr parons. Nol jere just che dutis chês storiis a lessin in strucje, cualchidune brute sì, magari une beghe di nuie a riscjave di mandâ ducj chei agns a cjadaldiaul, come aghe di seglâr che mene vie dut il sporc de massarie.

Ma  cun lis bielis… a Svualt i capità sot i voi un numar gjavât fûr de agjendine dal ’68. I ricuarts come lampadis si impiarin, i avigniments di chel an, come anei, si instreçarin tra di lôr formant une solide cjadene di sucedûts: la universitât, i moviments studentescs, lis corsis in motorin cun Dominique, la parigjine, che si strenzeve ae sô vite come elare al mûr. Events salts e ferbints, cjapâts de man dai disevot agns dal zovin.

Il numar di telefon de femine al jere li, Svualt lu cjalave sturnît, si sintive intorteât, al ve atims di esitazion. Scartant il telefonut al le viers chel fis, cun chel al,veve fevelât cetantis voltis cun jê ai timps. Al  digjità i numars… al sintive i sunôrs di chê altre bande… al pensà che nol fos nissun in cjase… al steve par metilu ju, cuant che al sintì chê vôs tant ricuardade:
– Bonjour, qui parle?

di Galliano di Buenos Aires
#1115

1 comment