Il cjapiel

Al jere stât comprât par completâ il vistît di nuviç, al jere un biel cjapiel, grîs, che al sta su dut, di feltri cuntune biele curdele.
Dopo lis gnocis al vignive metût dome par lâ a messe, par dut il timp al restave poiât sul banc.
Dopo messe, par un tai o une partide di cjartis al lave in ostarie. Plantât bas su la cadope  par lassâ la muse libare par fâ i segns, par un as o une briscule.
Al vignive fûr dal armâr ancje pai funerâi e pai batisims, naturâl. Cul passâ dai agns ancje se al veve viodût plui armâr che int, un pôc a la volte ancje lui al jere cambiât, nol jere plui cussì lustri, ma al faseve la sô figure…
A une cierte ore il Signôr al à clamât a Se il paron dal cjapiel, e stant che no si pues presentâsi devant dal Dominepatris cul cjapiel sul cjâf al è passât in ereditât al fi, che lu à gjoldût.
Ben planc al à scomençât a lâ fûr no dome di Domenie, ma ancje tai dîs di vore.
Cul timp al veve pierdût la curdele e di grîs al jere deventât vert scussât, cussì al veve cjapât la vie da la campagne.
Al à viodût cressi jerbe e madurî la ue, colâ la nêf e la ploie, cence contâ lis bestiis de stale.
Nol stave plui sù dret, al colave su lis orelis, nol jere plui nancje tont, ma al jere cussì comut.
Une dì un gnûf al à cjapât il so puest e lui dopo une biele lavade e stirade al è deventât soletis par scarpets e tignint cjalt i pîts dal paron al à continuât a lâ pal mont.

di Silvana Zanella
#1060

1 comment