Ocasions

In chê dì al ploveve e alore o decidei di restâ in tal jet fintremai che o varès vude voie di stâ intal jet. Ma cuant che il gjat al saltà sul jet, o decidei che no podevi plui restâ in tal jet e mi tirai sù dal jet.
A pene che o lei jù in te strade i disei bundì a un siôr cjossul che al passave, che lui nol mi cognossè e veramentri ancje jo o scuen ameti che no lu cognossevi e, par chest fat, dal moment che lis robis a son cussì metudis, jo o scuen considerâlu un scognussût. Ma chest nol gjave chê.
In tal doman il soreli al spacave lis pieris e o decidei di no intardâmi plui. Aromai la gnove e jere di domini plublic, ducj a savevin che jo o jeri un eterosessuâl di piçul in sù. Ma il mûr di Berlin cumò si lu vendeve a tocs e no si cjatave un idraulic nancje a pajâlu aur. Anzit, veramentri il probleme al jere che Diu nol esisteve, ma, secontri me, chest a lu savevin za di un biel pôc. O dìs secontri me, par vie che lis opinions a son il sâl de tiere e cui che al va planc la gjate al ardiel l’union e fâs di sè al fâs par trê tigris cuintri curint dal golf di Napoli e po mûr di clap e di modon, come che al diseve un filosof no vueit di ingegn, che però al faseve un altri mistîr, par vie che al veve ben di vuadagnâsi il pan e cui proverbis massacrâts e miscliçâts un cu l’altri, no si cjante messe e nancje Ursule parussule.
L’essenziâl in chestis robis al è di no lassâsi cjapâ dal scatûr, ma, stant che jo no vevi nuie in contrari, Paulin nol vegnial a dîmi a mi che nancje lui nol veve nuie in contrari e o constatarin che o jerin d’acuardi. Par festegjâ si rimpinarin ducj i doi sul versant a misdì de mont Rose, o salacor e jere la mont Blancje, o soi un tichinin daltonic, ce batudate seme, ce aio di fâi?
E jere ore di finîle e alore, stant che e jere ore, une dì a buinore, bedalore ch’o jerin in tancj in tal Consei di Aministrazion, mi jevai sù, o batei un puin su la taule e o sberlai: «Se la vacje e fâs un vidiel, al vûl dî che il taur le à montade». Ducj a baterin lis mans, scuasi ducj, ducj. Furche Pieri, che ducj lu clamavin Sanpieri parvie ch’al veve lis clâfs dal Paradîs. E cuant che jo o leri par jentrâ in Paradîs, Lui nol volè lassâmi jentrâ, parvie che jo no i vevi batûdis lis mans in chê volte, ma, Pieri, tu sês tu chel nol à batût lis mans! però al veve batût i pîts, cui savê lis usancis dai sants!
E jere la dì des kalendis, ma no jerin chês greghis e jo no savevi ce fâ, no vevi nuie ce fâ e alore, par no savê ce fâ, o ai copade mê agne intal cimiteri di Buri, mai viodude chê crôs? ancje se il cjastjel al è biel cu la zoventût che e ven jù de Cjargne a bussâ fantatis bielis, che la ago frescjo e je buino e cheste conte no je une conte e je
daûr a strissinâsi a vueit e che no rive a rivâ in somp, par vie che l’autôr, ch’ o sares jo, nol è bon di cjatâ une conclusion cualsisedi, ma sojocolpejosedutcechesipodevescrivialebielzàstatscrit ‘‘’^?

di Laurin Zuan Nardin
#1043

1 comment