L’aiar cence non

Al jere nassût par câs par vie di un miscliç cumbinât dai agjents de atmosfere ta un timp no pandût. Tal so jessî al veve dutis lis carateristichis dal aiar: al podeve sgarnî sù dut, jessi malcuiet, gambiâ simpri vele… insumis une brute ande e di pì al jere cence colôr. Lui però nol doprave dut chist come chei altris aiars, no si sintive come lôr; chei a vevin encje un non: buere, tramontane, maestrâl e tant lontan di chenti a jerin altris aiars braurôs, famôs. Al veve cirût tantis voltis di fâ un pocje di amicizie cun lôr, ma a chei no i pocave masse di vêlu pai pîts e lu scorsavin vie “Tu sês flap”, i disevin “E in zonte no tu âs nencje un non, cemut fasino a clamâti?” Lui, plen di sudizion, al scjampave a taponâsi jenfri lis pieris des monts, encje par vie ch’a vevin metût ator la cjacare che lui al vignive dal forest e di sigûr la sô nature no jere clare. Cui podie jessî, un che si sgrisule a viodi chei altris aiars che cul lôr tirâ a mat a strissavin il nûl, fin a falu vaî come un scoreât, lôr ch’a jerin scuasi contents cuant che a sintivin a dî: “Se aiarat! al tae parfin la muse!” e a jentravin par dut cence rispiet e creance. Lui, invezit, al veve dentri di sé un grant sens artistic: cuant che la nêf e scomençave a colâ al faseve in mût che i flocs a deventassin tantis paveis blancjs e lis faseve svualâ ator; la aghe le faseve deventâ tocs di diamants e cul soflâ lizer lis nulis a deventavin bombâs, ma par vie che lu vevin cjapât in piche al rivave cualche aiar brut a disfâ li sôs creazions. Nissun al è complet tal so jessî, tant mancul l’aiar ch’al è simpri a cirî ce che nol cjate, l’intîr di se stes al è dificil cjatâlu. Cussì al scomençà a lâ ator ta lis oris piçulis, intardantsi a voltis sul cricâ dì, e al fo ta une di chês matinis che un aiar lizêr come une pavee lu sfreolà, par po disfâsi subit daûr. Cui sa di cui che je chê soflade cussì dolce, al pensà. Si maraveave, nissun si jere mai interessât di lui. La matine dopo al fasè di dut par intardâsi e i parè par fin di jessî tal mieç di un sium, cuant che al si sintî di gnûf chel reful che lu ciarinave. Dut ingusît, al parà vie la sudizion e al domandà: “Ma cui sêstu tu? Di dulà vegnistu?” Come une zumiele di notis e rivà la rispueste: “I soi la bavisele e cul gno soflâ dolç i fâs dal miôr par disfâ il calôr dilunc vie lis gnots e des primis matinis d’Îstât”. “No vevi mai sintût a fevelâ di te” “E je vere, ma jo o lavori cence fâ rumôr e no doi tal voli. Il miò soflâ al è dolç, tant che al rive a cjarinâ encje l’arpe e soi convinte che ogni opare encje la pì importante a devi jessî fate tal cidinôr.” Cheste rispueste i fasè capî che nol veve plui di vergognasi dal so mût di jessi e che cualchidun che i someave, i varès fat companie. Cussì tal cricâ dì tes matinis d’îstât la bavisele e l’aiar cence non si jevin insiemi e a passin a rinfrescjâ dut e l’albe ju cuche contents tai colôrs dal Creât.

di Marisa Gregoris

#996

2 comments