Pentecoste

Pentecoste! Trop che mi plâs chê fieste. Naturalmentri parcè che o pensi ai miei viaçs in Gjermanie. Ma cumò, cuant che o ricuardi chest episodi, o sin tal mês di mai dal 1983, cu la Gjermanie dividude in doi stâts nemîs tra di lôr. O sin ancjemò ai timps de vuere frede. Nissun nol varès mai imagjinât ce che al sarès sucedût di li a sîs, siet agns.
E alore o varès voie di butâ su la taule cualchi fotografie, cualchi ricuart di chê marce a Vittorio Veneto. Jerino volontaris? Mi samee di sì. Cemût jerino vistûts? Bermuda kaki, maiute colôr vert ulive e Superga verdis? No viôt alternativis.
Lis Superga si impantanarin… o colai tal prât intune culine cuant che o levi di rive jù… peraulis cuntune fantate che e coreve cun nô… un vieli che al contave i partecipants e al jere rivât al centenâr… ce rabie! Jerio restât cussì indaûr? Tonon, un soldât ocjalon di Asolo cul cuâl o jeri deventât amì, e al coreve cun me, al jere masse lent. Al fevelave di cjatâ une fantacine di “tirâ sù”.
Il biel soldât Palazzolo la morose le veve za e e veve di cori insiemi a lui. Mi visi che al veve dit une frase che si riferive a jê cuant che ancjemò no jere rivade: “I sbreghi via l’utero”. E sameave cuasi une frase furlane e invezit al jere venit. No sai però a ce proposit che al veve dit chê robe: forsi parcè che no si jerin inmò incontrâts?
Jo no mi sarès mai insumiât di disi une robe dal gjenar a une fantate, nancje par scherç ma lui al jere un di chei oms che ‘non devono chiedere mai’ (vecje propagande DENIM), no come me e Tonon.
No volevi restâ tes retroviis ma cori, competi, combati! Mi sameave di tornâ indaûr a lis mitichis marcis lungjis di mode tes sagris furlanis dai agns ’70, lis corsis che o fasevi di fantacin…
Ma o jeri cence alenament. Al sprint finâl cun altris soldâts o jeri cuet.
Il V Rolle di Sacîl e la caserme colegade di Vittorio Veneto a scugnivin mandâ une rapresentance e jo ancjemò vuê o ten come ricuart la medaiute de AVIS che ti devin a la iscrizion. Le conservi cun braùre.
Parcè che o ai un splendit ricuart di chê corse. Jessi a pene rivât sù dopo trê mês in Basse Italie intune caserme no lontane di cjase. Vê fat une corse cun gnûfs amîs tra lis culinis, tal mieç di un magnific paisaç. E dopo al è mai, il cîl al è cuviert e al è cuasi un aniversari. Un an prime ma un dì in mancul o jeri a sunâ a S. cu la bande e a jerin lis dôs bielis sassofonistis, Giada e Lorenza… la ploie… la procession…
Durant la gare o varai di sigûr pensât a chê zornade di un an prime…
Mai. Il mês plui biel e la fieste di Pentecoste che tant valôr e varà par me a partî dal 1998 e almancul fin al 2010 cui pilgrinaçs in tiere teutoniche…

di Checo Tam
#990

1 comment