Ranç

Demis al jere un di chei fruts che, il prin dì dal prin an di scuele, ju lampavi aes Mediis pai voi spaurîts.
No son tal lôr jessi. Ur pâr di no savê nuie. A prein il Signôr di no vê cefâ cun domandis. E magari fâsi ridi daûr, di chei altris fruts.
Alore si sentin, par solit, insom de file e a stan un fregul platâts di chel denant.
I prins dîs di scuele, mi remenavi pal curtîl, a ricreazion, des lôr bandis, spietant di butâ la peraule, cjatâ il cjaveç di un glemuç imberdeât tal lôr sintiment, inviâ la glagn di une part di discors, magari sul cjan, sul balon o sul presit de blave, feveluçant ca e là e spietant il moment bon di lassâju fevelâ ancje lôr.
Cun Demis al à funzionât il rimpin dal non.
Strupiant il so cognon, ai tacât a clamâlu Ranç. Ancje in classe. Magari tal clamâlu fûr ae lavagne.
A lui al devi vêi parût un non in parintât cun Rambo. Le à butade sul ridi. La pôre si è biel planc sfantade vie. Lassant, di chê strade, il puest ae fiducie tes sôs fuarcis, a pâr di ducj chei altris. Massime tal contâ e scrivi lis storiis di miserie e sotanance de puare int dai siei vons e il puest des sôs lidrîs, cence cori a platâlis insom de file di bancs, ma pront a contâlis cun dignitât in face ae lavagne.
Al è passât tant timp di chel an di scuele, ma si pensìn ogni volte, cuant che lu cjati pe strade, che al va ator cul cjanut, “mandi” lui e “mandi, Ranç” jo, in confidence.
di Ivano Urli
#986

2 comments