Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
Vir ius (Ah, om, la justizie)
Rivocs di lûs si spandevin pe citât, iluminant lis sacumis di palaçs impisulîts e gjavant vie misteris ae scuretât des andronis. Purpûr, no jere gnot di colm di lune e no jerin nancje i ferâi des vuardis, che a saressin passadis plui tart a controlâ la int sierade in cjase, come che e comandave la leç.
Dal alt de sô fuartece, il sovran gnûf si gjoldeve chel fûc che dal çuc al impiave a dì dute la taviele. Un fogaron che, in un ciert sens, ancje se nol jere peât a un rituâl, al vierzeve une ete: chê dal so imperi. A brusâ a jerin lis cronichis di vuerîrs e politics, lis scuviertis di sienziâts e esploradôrs e lis contis dai cjantôrs. I autôrs di chês pagjinis e i lôr protagoniscj a jerin za stâts dispicjâts, o mandâts al confin, cumò a mancjavin dome i libris. Nuie al sarès restât di chel savê. Di chel moment, e esisteve dome la sô, di storie. Dal rest, e jere la uniche maniere par guviernâ in trancuilitât. No si tratave di lassâ il popul te ignorance: lui al ufrive la sô, di veretât. Dentri di chê, la int e varès podût cjatâ dutis lis rispuestis. Nol jere ametût altri pinsîr. Pene la muart.
Il comandant des vuardis lu discjolè dal resonament.
“Vêso finît?”.
“Sì”.
“Sono ducj là?”, i domandà il re cjalant la culine.
“S-sì”. Il comandant al ve une esitance. “O vin lassade une copie par ogni opare”.
Il sovran al inriçà lis ceis: “Us al aio ordenât?”
“No, ma o pensavi…”
“No ti ai domandât di pensâ. Brusait ancje chês” al rispuindè cun asse. “Sono dutis?”
La vuardie e sbassà i voi. “E mancje la biblioteche tes vuestris stanziis privadis”.
“Chê me gjestìs jo. Benon”.
Je veve fate. Nissun al varès podût ruvinâ i siei plans.
Cualchi dì dopo, il comandant al tornà a palaç. “O vin un cospiradôr”. Il sovran nol batè voli. “O cognossês la leç”. “Sì, ma… al è vuestri fi”. Il re al sblancjà. “Al à contestât il mestri a lezion”. La vuardie e lassà colâ denant des pipinis stranidis dal reâl un volum. Un volum de sô biblioteche. “Ce fasìno?”. Il re al cjapà sù il libri. “L’om al domande pietât. Ma un re al à di rispietâ lis leçs. Si fasi ce che al è just”, al decretà sbregant lis pagjinis.
CovidCurte day 20 – Conte nr. 3
#963
2 comments
Lasse une rispueste
Dutis lis contis
E o sin rivâts a la conte numar trê dal nestri CovidCurte day 20! Un titul che nus dâ za misure de cure inte scriture de conte, e dai contignûts che no pandin biei sintiments, ma a metin cui che al lei cu la schene tal mûr. Un mont incuietant, che al è stât e al pâr che – in cualchi maniere, magari ancje cence flamis – al stedi par tornâ. Leieile cun calme e vôs fonde, o pûr scoltaitle contade de nestre Massarie.
No si distrûg le storie brusant il libri che le conte, restarà simpri scrite su lis pieris di ce ch’al reste, dant a chei di dopo le posibilitât di lei le veretât. Lussian