CovidCurte Day 20!!!

L’Ostîr i à pensât un biel pôc parsore, a cheste robe, e dopo al à decidût che al fasarà ce che al sta par dîus:

Il Contecurte Day 2020 si fasarà!

Come che o savês, e cui no lu sa, il Contecurte Day e je la gare di Contis che par solit o fasìn inte prime metât dal an e al è l’event plui grues de nestre Ostarie, dulà che i contecurtârs plui babios si sfidin cu la lôr conte par viodi cui che al vinç. O vin tacât a Listize, dopo lu vin fat a Flambri, dopo a Passarian e l’an passât – la supergalatiche edizion dal decim inovâl – a Sclaunic, cun tant di television e super fieste ae fin.

Chest an, pûr trop, o sin jentrâts intun gatul che ancjemò no nus fâs viodi un fregul di lûs e nus tocje tignî cont di leçs plui grandis di nô, ma no par chest o vin di butâsi jù e fâsi cjapâ de maluserie. Come che o savês, l’Ostîr di mestîr al insegne economie, e al sa ben che al è propite tai moments plui bruts che no bisugne rindisi e anzit, si pues tirâ fûr alc di biel e di gnûf. E cun di plui, come che us vin dit, la neste rispueste e je chê dal CoroneCurte: i din sot cu lis contis, us regalìn poesiis dal balon su facebook e ve chi… no vin voie di anulâ il Contecurte day, ma lu fasarin come simpri e al sarà dut in version digjitâl!

Di sigure al mancjarà il plasê di gjoldisi la scolte des contis in cjar e vues, ma la nestre Sartore e je za in plene vore par podê garantî di podê scoltâ lis contis e o viodarês che se la cjapìn ben e sarâ une biele maniere di dâi cuintri a chest moment e al saltarà fûr un Contecurte Day che nol varà nuie di mancul di chei altris.… Si che duncje, pocjis cjacâris e velis chi lis regulis:

A scomençâ di cumò, dai 23 di Març e fintremai ae dì di Pasche, o podarês inviâ la vuestre Conte ae solite direzion di pueste par partecipâ al Contecurte Day 2020 che o vin ben pensât di clamâ COVIDCURTE DAY 20.

La conte e je a teme libar e al baste che e stedi sot des solitis 2000batudis, spazis comprendûts. Lis contis, a vignaràn publicadis vie vie sul nestri sît, in maniere anonime, e a podaran jessi votadis, dopo Pasche, di ducj chei che a son iscrits ae nestre liste di Contecurte (chê de Conte dal Mês, insome)!

Lis votazions a tacaran dopo che si è sierade la publicazion des contis, ven a stâi dopo Pasche, secont modalitât che viodarin, a seconde di tropis contis che o rivin. Par cumò si fermìn cul invidâus ducj a scomençâ a pensâ a une biele storie di contânus. Al sarà il nestri Decameron furlan, achì, sierâts in cjase, ma ducj insieme a contâsi storiis, come che si faseve une volte tes stalis.

E mai come chest an, nol è impuartant cui che al vinç, ma al è impuartant partecipâ, jessi presints, contâ une storie… parcè che o sin lis storiis che o contìn, e o vin inmò une vore di contis di contâ!

Scriveit. Leieit. Partecipait. Sparniçait!

2 comments