Contis Cence Cjâf – Lis contis

Inçopedât tai siei voi, braçolansi tal so pet, tal so cûr come la elare sul mûr, al cirive la vite.

Cjoli là che al è e meti là che nol è. Le panarie dal paron si jere svuedade e ator ator de taule la polente e jemplave ancje i plats dai canais.

…. masse tart.. e po tu sês un comunist. Tam, tam la cjamese penze di sanc… mostrave chei voi cence vite.

El aiar al glace e al ingrope pinsîrs e peraulis fers te bocje che a no ûl spalancâsi par pôre dal frêt.

Le veve cirude dute le vite cence cjatâle e cumò le veve denant dai voi e nol rivave a crodi a tante furtune.

Mi maravei di tantis monts e dal mâr lontan e no mi sint bessôl devant di chest splendôr

I ai mateât cussì tant ch’a si è sacraboltât l’imprest.

Un lusôr te gnot si vissine, daspò al cambìe e al devente ricam blanc, cence busis, fis e lizêr come plume.

Za prime che al si fos distudât chel Soreli che i Gjôs a àn vût impiât di fûc e di dolôrs, i aiars a vevin dispoiât de cinise lis ruvinis di Tenochtitlan, la Dumble-sul-Lât; ma lis mês agrimis maris no si fermin cuant che o intivi sot dai dêts, tune sachete di piel, i rincjins verts de pueme dai miei dîs contents.

Tes gnots d’Unvier i voi dai nevôts a lusoravin come lis boris dai lens cuant che la none e contave liendis di principessis e cjastelans.

A Ajrons di Percût e nas Alda, une frute muarte, no jessint batiade, al ven il mes comunâl, le met intune scjate e le fâs soterâ fûr dal cimiteri.

E la muart tal fûr di ore e à metût il sio presint, tu bessole al scûr da tiere jo in chê vie a scûr vaint.

Sot chê crôs dal cîl volude o poi une rose umidide, no son gotis di rosade, dai miei voi ae bagnade.

Se il gno sanc al bastàs par dâti su di me il tio respîr, spinarès dutis lis venis pûr tornâti al gno cûr.

E Diu, dopo vê passât la setime zornade a polsâ, vint plasmât il plasmabil, al restà a cjalâ lis primis formis di vite cressi, deventâ organisims, saltâ fûr dal mâr, madressi in dinosaurs, retii, ucei, mamifars, specializâsi in oms e daspò al passà la ore a viodiju cressi in stature e in sgrimie, fintremai che a no rivarin a sdrumâsi un cun chel altri, lassantlu une altre volte di bessôl tant che, a chel pont, al cjapà la cjere e la scliçà, tornant a fracâle dentri ta nape, di dulà che a jere vignude.

La dissiplinade durece dal om tal no volê o no podê mostrâ i siei sintiments e socomp cuant che la sô muse e pant il don dal stupôr tal viodi l’ Arc di San Marc daspò di un temporâl.

Mandi, frut, i disè so pari cuant che al partì pe Americhe che, lontane,lontane, lu spietave par no fâlu tornâ mai plui.

Cumò che nestris rapuarts a son finîts, mi lassi colâ jù, zirant cence fin par rivâ cun dolcece a toi pîts, cheste Sierade.

Il nuie al fâs plui pôre che un scûr plen di mostris fin che si frache il prin boton, daspò si popole di peraulis tremolantis e spauridis.

Dutis lis peraulis a svolin, mancul chês che a stan tai libris, fedêi compagns di ducj i moments.

Il timp al è un grant circul, nol à principi, ne fin, dut al torne, une e une altre volte, simpri cui ricuarts.

Il mont microscopic al somee al mont de anime, ducj i doi a àn plui abitants che il barlumâ dai nestris voi.

Intun marilamp il gno pinsîr si voltolâ mostrantmi il finâl des mês sperancis.

Mê mari mi à regalât un rassat par fâ al brût bon, lu ài clamât Pierino, ‘o sin diventas amigons,ma une dì che mê mari e je vignude a cjatâmi, tant c’o jeri a fâ le spese, lu à copât par fâmi al brût bon.

‘O soi stade operade al sen e al cjanut cul so amôr disinteressât, mi à salvât de depression.

Chest an o ai imparât a fevelâ e a scrivi un pôc di furlan e a scoltâ bielis leturis cul gno professôr e cui miei compagns di classe, come che al fos un zûc cun Zorzut Chealsadut.

di Margarita Tondon

L’odôr dal prât seât mi dismôf ricuarts, respîrs e libertât, o corevi par rivâi e cjarandis, intant che bugadis di aiar a remenavin l’acuilon, il spali al mi scjampà di man e libar lu viodei smalitâ tal cîl distant, si slontanave in cercje di altris suspiradis cunvignis.

La Justine e diseve che cuant che so pari al tornà de Gjermanie, tal 1918, daspò de Grande Vuere, al jere un om diferent, al veve pierdude la ridade.

Scrivint al è tant che meti la sedon intune cite di marilenghe, il savôr al dipent dal cogo che al à metût lis peraulis une par une, e lis à lassadi frizi tal lôr gras fintremai che e rive la voie di cerçâlis.

La imagjine dal spieli lu cjalave cui siei voi e no lu ricognosseve, spaurît, Zuan al de un pugn cuintri di lui, lis sclesis lu svuarbarin.

O destinai al doman di domandâti dal destin dal to non; ma, te dismentie, dome di me o disei, e mandi.

Daspò di tancj agns o rivai a chel lontan paisut che i miei paris mi vevin tant fevelât, o començai a cjaminâ, no cjatai nuie di chel che jo o vevi tal cjâf, dut al jere cambiât, dome la glesie di Sante Marie des Crencis, cu lis cjampanis moladis al vint e jere come le imagjinavi.

Di chei che a àn tabajât tant nol reste nuje, ma di chei che a àn scrit, ancje pôc, alc al reste.

Jo no savevi se al fos un don regalât a chei che tant che me a fasevin i mâcs, o se mi sucedeve dome a mi che intal propit moment di un efiet o percepivi jenfri i voi di chei che o fasevi une magjie, un passaç dal che si podeve tocjâ la lôr anime, ma no jeri mai olsât a tentâlu fin che j ài cognossude.

Jo no vevi mai savût cemût che al fos stât il rivâ dret ae anime di nissun, po ben in chel moment o jeri ingjenui no dome dal fat che dut me stes si sintìs jemplât se no cjapât di jê, cun lis sôs storiis e percezions, cui siei sintiments e lis sôs pôris, i siei sens fintremai il so nulôr.

Jo no savevi che propit jê mi podedi inmagâ a mi che o soi un mâc, e cence nissun truc ipnotizâmi dome cui siei voi, stregolantmi par simpri; jo no savevi di vê cjatât propit une strie.

• 

  Frank Spada http://www.frankspada.eu has written: 25 di Novembar dal 2013 at 11:44 PDM Rispuint

  O4 – Bondì Nello / ué si festeggie il Zardin Grant e Sante Caterine / Buine zornade.
• 

  Anonimo has written: 25 di Novembar dal 2013 at 2:04 DM Rispuint

  Bieles dutes tre,massime la doi e la tre, indula che bulighe la fuarce juste a taia lis cjavecis dai puars sotans.

  Lusian di Varian
• 

  Anonimo has written: 25 di Novembar dal 2013 at 2:56 DM Rispuint

  Al cirive, no al curive la vite. Sares di corezi
• 

  Galliano has written: 25 di Novembar dal 2013 at 4:39 DM Rispuint

  Brâf par sei rivât il prin a "Contis Cence Cjâf"

  Augurons e mandi
• 

  Galliano has written: 26 di Novembar dal 2013 at 1:19 DM Rispuint

  Tal "Brâf par sei rivât il prin"… mi riferivi a Nello di Feagne

  Mandi
• 

  Anonimo has written: 26 di Novembar dal 2013 at 3:16 DM Rispuint

  Mi plâs la pore di olsât di Silvia e la presince eterne de mignestre de None di Damiano
  Nelodifeagne
• 

  gelo has written: 26 di Novembar dal 2013 at 4:42 DM Rispuint

  o disarès che o vin scomençât plui che ben, ancje se i va ben a nello, che a nol è l'antidoping… si no… 😀
• 

  Anonimo has written: 27 di Novembar dal 2013 at 9:20 PDM Rispuint

  La inpinion di Lusian di Varian fate il 25/ 11/ 13 a las ores
  15:04, si riferive ai tre prims lavors di Nelo.

  Lusian di Varian.
• 

  Frank Spada http://www.frankspada.eu has written: 28 di Novembar dal 2013 at 11:13 PDM Rispuint

  Da oggi in poi so quel che potrò fare / par vie che lu savevi bielzà prime / 11:25
  ps – proponimenti postumi
• 

  OSCAR B. MONTOYA has written: 7 di Dicembar dal 2013 at 3:44 DM Rispuint

  Felicitaciones para Mercedes (contis 21 y 22) y para Ana (contis 23 y 24), arlevis dal Taller de Furlan de Societât Furlane di Buenos Aires, por su participación en el concurso. Un salût di cûr e mandi.
• 

  Galliano has written: 11 di Dicembar dal 2013 at 12:52 DM Rispuint

  Compliments a Margarite (arleve dal Taller di furlan de Societât Furlane di Buenos Aires) par vê imagjinât che steve imparânt a lei e a scrivi il "furlan" de simpatiche e divertide man di Zorzut Chealsadut.
• 

  Anonim has written: 8 di Zenâr dal 2023 at 4:09 DM Rispuint

  Biel riesumâ pinsîrs soterâts. Lussian