Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
Palmire, la poleçarie
Al cjar di Palmire si scomençave a viodilu cuant che, daspò de crosere, al cjapave il retilini dal stradon che lu puartave insù tal paîs, si direzeve come ducj i lunis (plovessial o svintassial) viers il marcjât des bestiis. Man man che si leve svicinant si podeve viodi il contor dal cjar e de marcjanzie sore dal stes. Lis stiis, une sore chê altre, a jerin plenis di polam di ogni gjenar e fate e ancje se ben leadis, a parevin simpri sul pont di colâ, come chei cjistiei di cjartis che in cualsisei moment a fasin une fracassine. Palmire, sostignint redinis e scorie, e cjaminave daprûf stimolant chel sbols di cjaval. Tal so fâsi indenant, chel bocognon di femine e someave un gjenerâl che al puarte presonîrs robâts ai nemiis.
Cheste cristiane si merete dôs peraulis: a buinorone e daspò di vê cjamât il cjar, si sentave devant di un toc di spieli poiât sore la taule e cjalantsi in lui si deve une biele incipriade.Cuant che e partive la sô muse cicinose e someave a di chê di une pipine di porcelane, une superficie tarondine e slisse, in ogni câs une cosmetiche di pocje durade. Tant te Vierte che te Sierade e puartave simpri un façolet sul cjâf, fat cuntune tele rosse a rosutis stampadis; no lu ingropave sot il barbuç, ma in bande di une orele; di sot dal ôr i vignivin fûr cuatri piniis biondis e smamidis pes tantis ploiis e solions che a vevin cjapât. Cun di plui mari nature i veve dât dôs manonis fatis a pueste par cjamâ e discjamâ scjalârs e che, no dome i servivin par lavorâ, ma se al coventave, ancje par difindisi.
Une volte rivade te place dal marcjât e disponeve in biele mostre lis chebis cu la marcjanzie a vendi, lis clientis a rivavin cun diviersis bisugnis: une e voleve un cjapon par un bon brût, une altre des polecis par jemplâ il gjalinâr, altris un gjalut caporion par rimplaçâ chel muart di vecjaie e altris des gjalinis ovesariis. Prin di fevelâ dai valôrs de robe, Palmire che e jere une brave e scaltre rivendicule, ju puartave a fevelâ di chest e di chest altri, intervignint dome cuant che al coventave cui siei: – e si po, tu tu âs reson -, – e no po, nancje dîlu…
Tal moment just e seont la muse dal client e butave fûr un presit a la carlone, se chest al protestave e cambiave subit politiche par no pierdi la vendite, cun astuzie e zirave il discors cuntun biel scont.
Finide la zornade e cjariave dut di bessole, si le viodeve strache e sudade pe fadie, po si meteve in viaç, prin di lassâ il paîs a li sôs spalis si fermave te ostarie de Sperance, lassant cjar e cjaval daûr te androne e jentrave par une puartele secondarie, lant drete a sentâsi sot il bersò dongje de lobie. Mariute, la parone de ostarie, bielzà e saveve ce che e veve di puartâi: mieç di neri e sentâsi un moment cun jê a tabaiâ. Palmire i contave lis vicendis de zornade, cundiplui e riferive ancje dut il peçotament che man man e leve sintint dai tabaieçs des comaris. Intant il sudôr che i spissulave jù pe muse cence molâ, i moveve di sît la incipriade, soredut chê dal cuel che dovût aes particolaritâts dal puest si jere trasformade intun zîr. Palmire, cence scomponisi, une volte finît il mieç di neri e la tabaiade, e partive contente e ancje… un pôc legre.
di Galliano di Buenos Aires
#436
5 comments
Lasse une rispueste
Dutis lis contis
Galliano, a tu mi âs fât vignî iniment Jacum dai Zeis cul so cjar tirât dal mussut vie pai marcjâts. Chests personaçs come la Poleçarie e Jacum e jerin cognossûts e innomenâts par dut il Friûl. Cumò cuant che torni in Patrie o cjati tal gno curtîl un famee di cinês, une vore simpatics e lavoradôrs, ch'a van par marcjâts a vendi viestis cun tun furgoncin ben furnît di dutis lis comoditâts. Pecjât ch'a no si fermin mai intune ostarie a bevi un cuart di neri o ben un decimin di sgnape, come Jacum e la Poleçarie. Saludimi Buenos Aires, Bepi
Mandi Bepi,
Si po ben dî che il Friûl al à tancj di chescj personaçs popolârs soredut cjalant indaûr tal timp. In dì di vuê a vegnin rimplaçâts cun personaçs forescj, che a van cjapant popolaritât man man che la int ju cjape in simpatie. Cui sà che cul timp ancje chescj forestîrs si fermin te ostarie de Sperance a bevi une tace di vin prin di lassâ il paîs a lis lôr spalis.
Buenos Aires, cuntune biele zornade di Autun ti salude cuntun Adios
Galiano, la to conte mi à fât rivivi il vecjo Friûl.Tu mi âs fat tornâ tal cjâf lis nestris feminis di une volte, che cuant che a vevin pardabon sêt no ur displaseve alçà il comedon. Saludimi ducj i Furlans che tu cognossis a Buenon Aires.
Tu sês simpri brâf e al è biel leiti
Galliano,tal gno pais il vinars e jere simpri presint Taresie pessarie,e vignive su cul cjar tirat dal mussut di Maran a vendi masanetes e pes nono,e tornave indaur cuant che podeve fasint un grum di tapis tai santuaris graceos al glasalar.Biele la conte mi à dismot ricuarts di passe sessante agns fa. Lussian
.Mandi Nelo e Lussian, al è biel ancje ricuardâ a chestis feminis lavoradoris, (come dutis dal rest) che a vevin la man salde e il pols fer par lâ a fâ lis vendidoris ambulantis pai marcjâts, no vevin pôre di nuie, nancje di jentrâ tes ostariis a bagnâ il bec.
Us saludi a ducj i doi e buine Vierte.