21 di Març dal 2016

Aeroplanuts di cjarte

– Mandi Anute, mandi mandi biele frute. –

– Mandi Tonin, mandi mandi biel frutin. –

Cussì si saludavin Anute e Tonin ogni volte che si viodevin. Lis lôr cjasis a confinavin. Ducj i doi a jerin nassûts tal stes an e mês, a vignirin su insiemi. Di pitinins a corevin libars come jeurs daûr di chês cuatri besteutis che a passonavin tal curtîl, cul cressi, jê e zuiave cuntune pipine di peçote e lui cuntun avionut di len.

Parie a scomençarin la prime elementâr. Ae frute le sentarin tal prin banc. Anute no alçave i voi ni dal cuader, ni dal libri ilustrât a colôrs. Si le viodeve diligjente e aplicade in dut chel che faseve.

A Tonin i derin il banc insom de aule. A dî il vêr, al jere simpri cul cjâf a nolis cjalant fûr dal barcon. Al veve une cundizion, chê di fâ aeroplanuts di cjarte, cun dai sfueis di fumets, che ju tignive platâts sot dal banc.

Cuant che la mestre cun la aste in man si zirave viers la lavagne par segnalâ alc, il frut al meteve in moviment il piçul aeri, fasintlu cjapâ velocitât, al sierave i lavris e sbrufant al compagnave il rulâ dal aeroplanut, “brrrrrr….”

Il bersai e jere la cjavelade di Anute, ornade tal mieç cuntun biel floc blanc in forme di pavee. La frute, cun bocje di ridi e fasint fente di rabiâsi, e gjavave cun cure il manufat imberdeât te gale, lu pleave par ben, metintlu vie jenfri i sfueis dal libri.

Cussì al finì l’an scolastic de prime elementâr. La pagjele di Anute e jere une des miôr, ricevint de diretore peraulis di laude. La frute e cjapave sú ce che e veve semenât. Impen la pagjele di Tonin e faseve dûl, il dit de diretore al fo scjars e precîs: – Al è un frut apatic e disinteressât al studi -, chestis riflessions lu faserin ripetent.

L’an dopo, Anute, cun la sô biele gale stucade, e jere tal prin banc de seconde elementâr, diligjente e aplicade come simpri. Cun segrete sperance, ogni tant e zirave il cjâf… il banc insom de aule al jere vueit.

Ae prime elementâr, i aeroplanuts di cjarte a continuavin traviersant il spazi aeri vuidâts de man di Tonin. Cumò la lôr trate e veve altris destins.

di Galliano di Buenos Aires

#544

13 comments

Yaio has written: 21 di Març dal 2016 at 2:01 DM Rispuint

Se par stâ tai limits o vin di fâle curte, cheste achi a é propite ben tirade e stirade cule ûltime rie a sorprêse ancje se biacemai si volarès la indenant cu lis rimis e tignî il Tonin cule Anute. Ma jo i soi otimistic e se Gabriel Marquez al diseve"Sólo porque alguien no te ame como tú quieres, no significa que no te ame con todo su ser" jo i disarès che nol é parce che 'l so spazi aeri nol plui il stes che il Tonin nol rivarà di nessune bande e pues dâsi che 'ne dí si incuintrin di gnûf in tun altri aeropuart par cjapâ il stes avion.Dutcâs lis viis des contiscurtis a son infinidis:-) Mandi
Jaio
Giovanni Nello Malisano has written: 21 di Març dal 2016 at 5:24 DM Rispuint

Galiano, jo o fasevi ancje lis barchutis. Tu sês brâf e come simpri al é biel lei lis tôs contis
Galliano has written: 21 di Març dal 2016 at 5:33 DM Rispuint

Yaio,
O soi dacuardi cun te, tu disis chel che jo o pensi. La separazion di Anute e Tonin e je circostanziial. Se Tonin a scuele al va indevant dome tirant avionuts di cjarte, puare la mestre che lu varà cun je cui sa par ce tancj agns.
Intant Anute… ma no le dit nuie. Anute e Tonin se no si cjataran intun cualsisei aeropuart, ti siguri che si, si cjataran in cualsisei supermarcjât. Mandi
Anonimo has written: 21 di Març dal 2016 at 6:33 DM Rispuint

Biei chei aereoplanuts ciariats dai prins nocents sintiments smicjats sui cjavei di Anute.Biele conte. Lussian
Anonimo has written: 21 di Març dal 2016 at 9:39 DM Rispuint

Mandi Galliano,
une vore biele la conte di Tonin e Anute, leile e fȃs ben al cȗr pe sȏ delicatece e pe inocence che a trasmetin i doi frutins.
Egle T.
Galliano has written: 23 di Març dal 2016 at 11:44 PDM Rispuint

Bundì Egle, Nello e Lussian, graciis dai vuestris preseaments. O profiti di chest spazi par fâus a voaltris e a dute la famee dai contecurtârs, tancj auguris di une Buine Pasche.
Luciano Marinig has written: 23 di Març dal 2016 at 1:36 DM Rispuint

Galiano,inte me scuele al è "Pierino la peste" cal fas aereoplanuts di cjarte e ju tire par dut,fasint inbestialì la puare mestre. Buine pasche a ti e a ducj i contecurtars.Alessia tierce elementar,gneçute di lussian.
Galliano has written: 23 di Març dal 2016 at 5:15 DM Rispuint

Alessia,
Prin di dut ti ringracii dai tiei auguris di Pasche e ancje par fâmi savê che te tô scuele o vês "Pierino la peste", che al vignarès a sei un omonim di Tonin il personaç de conte. Chest mi fâs capî che il pas dai agns nol à modificât par nuie: Pierins o Tonins indi jerin une volte, ma che a continuin ancje tal dì di vuê.
Buine Pasche a ti e a to nono Lussian.
Maman,
Galliano
Anonimo has written: 23 di Març dal 2016 at 6:55 DM Rispuint

Alessia brave. Tu prometis propit ben. Tu sês dute to nono e se tu vâs indenant cussì tu deventarâs une brave scritrice, plui brave dal nono. Buine Pasch a ducj.
Nello Malisano
Anonimo has written: 23 di Març dal 2016 at 9:50 DM Rispuint

Galliano, a mi a mi vignivin une vore ben ancje i cjapieluts di muredôr, sedi grancj sedi piçui; chei grancj si ju meteve par parâsi dal soreli, e chei piçui si dopravin come barcjutis. Za ch'o soi a us mandi i plui biei auguris di Buine Pasche a ducj, sperant ch'a nus lassin vivi in pâs. Bepi
Oscar B. Montoya has written: 24 di Març dal 2016 at 2:49 DM Rispuint

Para Alessia: una vez más me sorprende como la realidad y la ficción entrecruzan sus caminos. Ti auguri une Buine Pasche. Mandi.
Anonimo has written: 25 di Març dal 2016 at 12:45 DM Rispuint

Par Oscar b. Montoia,buine pasche a ti e famee. Alessia e nono lussian.
Anonimo has written: 26 di Març dal 2016 at 9:05 DM Rispuint

Us consei no dome i aereos ma ancje i missii… a bastin trei cerins e un fregul di stagnole voluçade… mi insegnà un complant amì moredour dal gno pays…

ADN