L’apontament

Sabide dopomisdì; al è ni vore cjalt e, par cjapâ un pôc di aiar, o tiri fûr la biciclete e o voi a fâ un zîr viers Rivignan. Fra San Martin e Musclet e je une lungje strade strete e in font dal retilini un svolt sec al mene a man çampe.

Rivât dongje il svolt o viôt un vecjo tabarossât intune gabane nere sentât sul parecjar, cul cjâf pleât e al pâr che al duarmi. No olsi a fermâmi e o tiri dret. Slontanantmi mi cole il voli suntun falcet butât intal fossâl e o pensi che forsit al è un contadin che al è stât a seâ intal cjamp e cumò al spiete che a vadin a cjolilu. Torni indaûr sot sere e il vecjo al è ancjemò li, sentât sul parecjar e cul cjâf pleât. Mi fermi e i domandi se al à bisugne di alc e lui, cence alçâ il cjâf, al rispuint che al à un apontament. La vôs dal vecjo e à un sunôr strani, di fâ pôre e o sint frêt jù pe schene. Lu saludi e lui al rispuint cuntun moto dal cjâf; cun dôs pedaladis mi slontani di corse. 

Tornant dongje mi fermi a bevi un got intal bar su la strade di San Martin, a pene fûr Codroip. Sentât fûr dal bar o bêf il gno spritz e o pensi al vecjo sentât sul parecjar, cuant che o sint un vosarili dongje di une machine, parcade li denant. Trê zovins cuntun grues bocâl di bire in man, poiâts intor di une 600 Abarth blancje, a ridin e a scherçin. Si capìs che a son bielzà zinzirinâts. O rivi a sintî nome un dai trê: “Dâi, finît la bire, che o lin a bevi la ultime a Musclet e po o lin a cene”. O scjassi il cjâf e o pensi a altri. Un pôc dopo o sint un grues vuicâ di gomis e o viôt partî businant a manete la 600 Abarth, viers San Martin.

L’indoman, sul gjornâl e in grant o lei: “Svolt sassin, une altre tragjedie da la strade. Sul svolt fra San Martin e Musclet, trê zovins cuntune 600 Abarth, a si sfracain cuintri un parecjar.” E po une pagjine interie di coments: Che a jerin brâfs zovins, che un dai trê al lasse une frutine di un an, chel altri al jere a pene maridât e chel altri ancjemò al si varès maridât il mês co ven. A jerin ni vore cognossûts e dut Codroip al è intal sconfuart.

O soi scaturît e mi visi di chei trê, che a ridevin e scherçavin, cence savê che cualchidun ju spietave sul svolt. Mi displâs par lis fameis, ma mi ven di pensâ che sa la son cirude.

Cumò son passats cincuante agns, il svolt fra San Martin e Musclet al è stât staronzât par ben, la strade e je plui largje e intal puest dai parecjars di piere al è un grues guard-rail.

O passi dispès cu la machine par chê strade ma ogni volte, sul svolt, o sint frêt jù par la schene.

di Pauli Jacuss

• 

  Giovanni Nello Malisano has written: 15 di Jugn dal 2016 at 9:33 PDM Rispuint

  Biele conte. Pauli lis tôs contis e deventis simpri plui bielis. Scritis ben e cuntun biel furlan. Cheste e je un fregul malinconiche, ma us fâs pensâ a no pierdi mai la capadocie soredut su lis stradis.Brâf.
• 

  Anonimo has written: 15 di Jugn dal 2016 at 12:03 DM Rispuint

  50 agns indaur…. mi fas pensa parsore,mi soven alc dal gjenar.Lis tos contis son meritevolis parce leadis un grun a la realtatd, dongjie la dimisticheçe di dopra peraulis un grun parchegjadis. Lussian
• 

  Anonimo has written: 15 di Jugn dal 2016 at 10:01 DM Rispuint

  Pauli, leint la to conte a mi son vignûts i grisui ancje a mi. Mi visi ben che parecjars di ciment o di piere su lis voltadis pericolosis o ben sui canai de bonifiche su lis stradis de Basse e che "bastarde" ch'a spietave i zovins bevucjâts, massime le domenie di sere…Bepi
• 

  Barbara has written: 16 di Jugn dal 2016 at 7:45 PDM Rispuint

  grisui jù pe schene: a si viodin dispes zovins cul ridi no a puest, un riduçâ …diferent e jo, come mari, o stoi za mâl. Biel e cul grop intal cuel il tô contâ…