LCPBDM #5.4 – Buteghe

E cumò tu sês tornât in buteghe, ma nol è come simpri.
Tu pensis a trop timp che tu âs passât su chês cjadreis, ta chel bancon, cun chê tace in man. Tu lu pensis in percentuâl su cincuante e passe agns vivûts ta chest borc. Tu pensis che nol è nuie di mâl, a stâ in buteghe, come che a fasin ducj, ta chest paîs, come che a fasin ducj, ta cheste regjon, come che a fasin ducj, ta chest mont di civilizâts.

La femine je cjase, tu tu vâs a vore. E tu sâs di vê dirit a leiti la gazete, a bevi une bire, a blestemâ, a ridi fûr misure par ogni cativerie o peteç, a cjalâ il cûl di chê fantacine che e à plui di trente agns mancul di te. Il dirit a dî porcariis, a dâ judizis che nissun ti domande su politiche o balon, a cjalâtal, chel balon, ogni volte che si pues, e a tornâ a cjase vinars e sabide un pôc cirulin, pissant su la cise e puçant di cjiche e sudôr. Tu pensis che nol è un drame lassâ la femine a disparecjâ, a lavâ i plats, a cjalâsi lis sôs cagadis par television, che da rest, no i paistu i abonaments?

Romanzo dei bar di provincia

Ma cumò e je ore di cene e la buteghe e je vueide, la fantacine no ti interesse, e nancje la bire che si è aromai scjaldade tes mans sudadis. O sês tornâts di li dal miedi. Tes analisis de femine al è alc che nol va.

‘Nt fasarìn altris, al à dit, viodarìn, al à dit, e tu di pôre, tu sês scjampât achì, in buteghe. No je nancje la television piade e no ti covente. E je musiche… une naine che ti niçule il cjâf. E tu pensis di trop che al è che no tu i regalis un sclapon, che no tu le puartis fûr a cene, che no tu passis une sere a cjase, a cjalâ la television dopo vê comedât chel cric che ti tontone di mês. E cumò che dut al è sul ôr di un foran tu pensis che invezit di restâ li, dongje di chel foran, tu sês scjampât in buteghe.

Tu pensis, e dome cumò ti è clâr, che se al è un Infier in tiere al è propit chel li: la buteghe. Ma forsit, intant che lis notis di chê cjançon a ti sbreghin il cûr, tu pensis che par scjampâ dal Infier al baste paiâ la bire e tornâ cjase, cence nancje finî di bevile, a comedà chel cric.

BOSCO, Placebo, Loud Like Love, [2013] 6’43”

La ultime robe che o vin scoltade e je di une vôs che ducj si cognòs, ven a stâi chê di Brian Molko, il cjantant dai Placebo. Dut câs, inte cjante che si clamave Bosco, gjavade di Loud Like Love, il lôr disc dal 2013, si va avonde lontans dai sunôrs tipics dai Placebo. Forsit une balade un tic ordenarie, a tamesâle ben, ma une cjançon che e à atmosfere e soference e e à ducj in numar, ancje cheste, par jessi une des cjançons plui bielis dal mont.