LCPBDM #5.3 – Sbrissâ jù

Lis robis si movin di bessolis.
Tu tornis cjase di li dal nodâr e tu ti rindis cont che dut, ator di te, si môf.
Si môf il lavôr, che al è simpri compagn e al è simpri chel, ma tu sês tu che no tu sês plui simpri chel. Si movin lis robis ator di te: i tiei plui vecjos e stracs, i amîs che no tu viodis plui o che tu viodis ma in maniere diferente. Si môf il mont ator, ma che po, ae fin, al è chel che ti puarte mancul fastidis in concret.

E pûr si môf. Al è come cuant che tu sês sintât sul treno in stazion, in bande di un altri e tu scugnis cjalâ l’orloi, par capî se al è il to che si môf o chel dongje.

Repulsiveblock on deviantart

Ma nol è un treno chest. E je la vite. E no la vite di ducj, e je la tô.
E cussì tu tornis dal nodâr e tu ti inacuarzis che plui che movisi, la tô vite e sbrisse jù.
Lâ a vivi cun Ludovica, par esempli, al è stât… normâl.

Normâl dopo tancj agns di murôs, di cori su e jù di une cjase a di chê altre, cui gjenitôrs framieç dai pîts. E normâl al è no vê plui tant timp par te, par scjampâ vie in mont a torzeon cence vê chê di tornâ adore, o pûr passâ lis seris o adiriture lis gnots in partidis cence fin di dungeons and dragons o cu lis cjartis di magic. O copâsi di cinema o di libris o di fumuts… dutis robis che Ludo no sopuarte. Si cres, ti disin, ma no tu sês dal dut convint di jessi cressût. Cambiât sì, ma no cressût.

E cussì tu tornis dal nodâr cul preventîf in sachete par lâ in bancje la dì dopo e, se dut al va ben cul mutui, in agjenzie, par firmâ il precontrat. Dut normâl. Normâl che Ludo e spieti che tu i telefonis par inzornâle, che tu ti mostris content, che tu tachis ca di cualchi mês, pene che si seis sistemâts, a cjacarâ di fruts, come che a sburtin colegas e parincj.

Dut si môf, dut al sbrisse, e ti pâr ancje une biele robe, chel lassâsi sbrissâ cussì, intune direzion che no covente sielzi nuie.
La vite e je cussì, no mo? La vite sì, tu pensis. E tu? Tu sêstu cussì?

Tu impiis la musiche e tu scoltis lis peraulis di une cjançon che tu cognossis, ma che no tu i vevis mai dât pês. E intant che tu vuidis e tu palpis il preventîf dal nodâr, in sachete, tu tamesis dut ce che tu âs metût in bande, di te, in chei ultins agns e no tu ti cognossis plui.
Tu varessis di fâ une telefonade, cumò, ma tu decidis di no.

Quando guardiamo una rosa, Motta, Semplice, [2021] 3’50”

Par cheste cjançon plui biele dal mont o sin vignûts in Italie a un di chei cjantautôrs che, cidin cidin, in ducj i siei discs al è rivât a tirâ fûr simpri cualchi biele cjançon. Lui al è Motta, il disc al 2021 si clamave Semplice e cheste ca che o vin sintût – Quando guardiamo una rosa – e je propite il toc che al siere il disc e al dà un sens al titul. Po dopo, par solit e di resint al è une vore plui energjic e rock, ma lis baladis come cheste ca i vegnin une vore ben.