LCPBDM #5.1 – Jump Jump

Tu âs cutuardis agns, anzit, aromai cuasi cuindis, e tu jessis di cjase cjalant i tiei che a bevin il cafè in cusine e ti tamesin cun chê muse nete, di cui che al pense che no tu vedis mai bevût, fumât, taconât o platât un smalt blu di trê euros sot de felpe, prime di lâ fûr di li di Sephora.
Un pôc ti fasin dûl, e tu i vuelis ancje ben, ma no ti passarès mai tal cjâf di disi che usgnot, te fieste a cjase di Rudy, al ven ancje Yassine, che a ti, pardabon, ti fâs dâ di mat. Biel, magri, tatuât, sigûr di sé, che al ven a scuele cuant che al vûl e al mande a cagâ i prof, cence fastidis, ancje se forsit, cul fum e cui bêçs simpri in sachete, al è masse convint e sboron.

Rudy lu à invidât di pueste, ancje se no i plâs, chel maranza, e cumò ti puarte in motorin li dal pancôr a cjoli la robe di mangjâ. Ah, se nol fos lui a scoltâ lis tôs gnagnis cuant che Yassine no ti caghe o al tacone ches stronzutis che no valin un fregul… Rudy ti à parfin dât une man cui compits par lunis, cussì doman tu puedis stâ a durmî cence fastidis, soredut, se come che tu speris, tu ti fasarâs puartâ cjase su la moto di Yas…

Ma cumò vonde insumiâsi. Tu montis daûr de schene dal to amì e lui ti zire la musiche su lis cufiutis. Sint chê robe ca, ti dîs, al è Tyler. E tu tu sâs za che ti plasarà, parcè che su la musiche o vais dacuardi di brut. Come sul rest. A smontais dal motorin che o sês ducj i doi che a movin il cjâf sù e jù, e o jentrais li dal pancôr balant, come doi deficients, cence nancje gjavâsi i airpods. Tu lu cjalis intant che al domande un chilo di pan e tu ti inacuarzis che… al è biel. Ma propite biel… Ti cjame la robe tal russac, al torne a meti la cjançon e cuant che il to pet al torne a poiâsi su la sô schene e al partìs il toc o tornais a balâ, sul motorin, come doi coions. E intant che tu cjantis Jump jump, tu ti inacuarzis che se Yassine usgnot nol ves di vignî ae fieste… no ti interesse plui di tant.

BIG POE (feat. Sk8brd), Tyler the Creator, Pharrell Williams; Don’t tap the glass [2025] 3’02”

Chest toc di rap merecan che plui merecan no si pues al è gnûf di pache e al vierç il gnûf disc jessût a Lui di Tyler the creator. Par cui che magari no lu cognos, Tyler, al è tra i musiciscj (e stiliscj) plui influents di chescj agns e tra i miôr rapper, insiemi cun Kendrick Lamar. Al è di Los Angeles, di divignince nigjeriane e canadese. Chest al è il so secont disc dal 2025, ma se il prin al jere scûr e dificil, chest al è une vore zuiarin e al fâs balâ, come ta chest toc, Big Poe, fat insiemi cun Pharrell Williams, che a fuarce di nigga e jump di ca e di là no ti fâs stâ fer. Il disc, come che al dîs ancje inte cjante, si clame Don’t tap the glass.