LCPBDM #3.4 – Copâsi

Desperate Grip – eneakelo

Lu clamin spleen, i francês, ma e je dute une grande cazade.
Tu tu la clamis disperazion. Ma disperazion parcè? Eco, e je cheste la disperazion. Jessi disperâts cence un motîf. Pensâ ogni dì che ti plasarès murî, e che a chest mont no tu âs plui nuie ce dî e ce dâ. Pensâlu intant che tu lavoris, che tu ridis, che tu mangjis, che tu taconis, che tu vâs in palestre, che tu menis il cjan a pissà o che tu porconis, parcè che al sbivicje e tu âs pene lavât la machine, o parcè che tu cjatis ducj i semafars ros. Pensâ al murî, al copâti, al no copâti, al vivi vueit. Pensâ che a meti dongje i minûts che a valin alc di dute la tô zornade no tu metis dongje nancje un, e cussì di zornadis e zornadis incà.

E pûr pûr no vê motîf par menâ dongje ogni gnot cheste disperazion e platâle cuant che e sune la svee. Vê un lavôr, une cjase, une femine, amîs, hobby, gjoldiments… vê une vite, insome. E no vê plui voie di vêle. E no jessi maluseriôs o apatic. No jessi stufadiç, cun chei altris. No jessi nuie che no si spietin che tu sedis. E invezit, dentri… Disperazion.

Ma salacor, une medisine tu le âs. A son des cjançons che a rivin a tirâti plui incà, a fâti pensâ di plui al copâti ma cence fâti vignî voie di fâlu. Un ossimori, forsit, ma tant al è. E cussì tu vâs a scoltâlis, cuant che ti covente, e tu tachis simpri di une che e je une bissebove di emozions, par te. Dulà che un si cope, ma invezit a son muarts ducj chei altris, e lui al è l’unic restât vîf. Come che tu voressis fâ tu.

Se no je cheste la cjançon plui biele dal mont, no tu sâs cuale che e je.

LA CANZONE DI TOM, Il Teatro degli Orrori, Dell’Impero delle Tenebre, [2007] 5’07”

Cheste cjante no covente presentâle, stant che se no vês sintût prime di cumò La canzone di Tom, dal Teatro degli orrori, il grup di PPCapovilla, al vûl dî che o vês vivût intune bufule une vore puare. Ma o podês vuarî e lâ a scoltâle, insiemi a dut il disc dal 2007, Dell’Impero delle tenebre, il prin di sucès, une vore rabiôs e une vore sincîr.