LCPBDM #2.3 – Perfezion

Young Man Reading – Octavian Schmigelsi

Une volte, cuant che tu jeris zovine, di chê etât che ti disin une robe che ti pâr vere e tu ta la impensis par dute la vite; cualchidun, no tu ti visis nancje cui, forsit une amie, forsit un morôs, nol impuarte, cualchidun ti à dite che nissun scritôr al à cetantis robis impuartantis di dîsi e par chest, lui o jê, al leieve dome libris curts, dongje lis dusinte pagjinis e mai, ma po mai plui di tresinte. A ti cheste filosofie ti si è inclaudade tal cjâf. E no si intint il fat dai libris, ma il fat des pocjis robis di dî.
Il fat dal jessi curts.

E in efiets, lant indevant te vite, tu âs lets ancje libris luncs e ti son ancje plasûts, ma chê robe li, dal jessi curts e strucâts cuant che si à alc ce dî, ti è restade dentri, e ti è restade dentri soredut cu lis cjançons, plui che cui libris. Da rest, te vite, si sintin plui cjançons, rispiet ai libris che si lein. Provait a pensâ e a fâ un cont…

Tu tu pensis però, cumò che la etât dai morôs e dal sturnîsi pes robis che ti disin tu le âs passade, tu pensis une altre robe, su lis cjançons. Tu pensis, che e devi jessi une lungjece perfete par la perfezion. Propit cussì, perfete par la perfezion. Tal sens che sì, bon, a son chês cjantis che a durin pôc e a son ancje bielis, ma nol è che ti ven voie di scoltâlis une altre volte e une altre volte e une altre volte… Di meti il repeat, insome. Chês perfetis a àn di vê une lungjece curte ma no tant curte, a àn di jessi come un taront fat cu la tace. E ti è capitât tantis voltis di cjatâ une cjante cussì, eh. Une volte, cuant che tu jeris usade a vê une cjarte e pene sot man, tu tignivis adiriture une liste. Dopo tu as smetût. E di cheste robe des robis di une durade perfete par la perfezion tu ti sês smenteade. Ti è tornade iniment vuê.

Tu âs impiât la radio e ti è capitade une di chês cjançons li, come un taront fat cu la tace. Tu ti sês visade parcè che pene che e je finide tu sês subit lade a cirî di tornâ a metile dal imprin e alore li tu âs capît che e jere propite chê robe li: une cjançon perfete par la perfezion. Chês, son lis cjançons plui bielis dal mont.

COLD LITTLE HEARTH, Michael Kiwanuka, Love&Hate [2017] 3’30”

La cjançon perfete par la perfezion, invezit, e jere une cjante scrite di un che di cjançons plui bielis dal mont a ‘nd à fatis plui di une. Lui al è MICHAEL KIWANUKA, inglês dal ’87, di Londre ma di divignince ugandese, che al tacât fasint il turnist e il toc che o vin sintût, LOVE&HATE, al jere curt, al va dit, dome parcè che al jere inte radio edit. Lu vês sintût sigûr, ca o là, tignût cont ancje che al à passe 360 milions di scoltis su spotify. Ma il toc origjinâl dal sô secont disc, dal an prime, dal 2016, nol dure cussì pôc, ma cuasi dîs minûts, e al à un difiet. Che se o vais a scoltâlu al va a finîle che si scoltais dut il disc. Ma al è un risi che si pues ancje cjapâsi.