Il ribel

L‘om al cirive dapardut, salacor i coventave alc par meti dentri lis robis che al veve tes mans. Prin al veve pensât di cjapâ un russac, ma daspò un sacut sempliç dal supermarcjât lu varès platât miôr. Si metè un cjapiel par scurîsi la muse e al le fûr.

Te puarte al veve capît che le varès vude dure, a jerin in pôcs a fâ la file par jentrâ. Si zuiave di balon chê sere! Bon, al jere bielzà tal puest, al scugnive puartâle insom. Cuant che i tocjave di passâ la sigurece, a vevin segnât un gol e al jentrà cence fâsi viodi.

Al zirave tai salons cence viodi ce che al jere picjât tai mûrs, al veve voi dome pai oms che a cjalavin la int, difidents. Cun chel ultin zîr, biel passant chê puartute piçulute, al capì che al jere rivât tal pont di no podê tornâ indaûr. Al jere cumò o mai plui.

Intun cjanton, platât di un grup di fantacinis che a ridevin tant che dindis mats, al fruià tal sacut par gjavâ vie il bussulot. Lu vierzè cu lis mans malsiguris e si svicinà al mûr, biel lassant il sacut par tiere, par che al cjaparès la atenzion dal om in monture. Dal moment che chel si jere dismot, al tacà la sô azion ribele.

Il licuit al veve fat la sô vore subit, la magle e jere tant che un flôr che si slargjave devant dai voi di ducj. Fers, maraveâts, a ziravin il cjâf par cjalâ lui e la magle. Lâ e tornâ, dai colôrs smamîts ae sô muse blancje di rabie. Il cidinôr si podeve muardi cun dincj disperâts.

Daspò al è partît il davoi. L‘om in monture lu veve cjapât pal braç, lis fantacinis si fasevin selfis devant dal cuadri maglât e une siorute piçulute e veve tacât a pacâlu cu la borse dure tant che se e fos plene di claps. Cuant che al vierzè la bocje par fâ la sô declarazion, l’om lu tirà dongje e intun secont la borse e fasè bersai dai siei lavris. Il sanc e i tocs dai dincj rots i lavin jù pe gole, scjafoiant lis sôs peraulis e puartantsi vie la sô vite. Il mont nol varès mai savût parcè che lu veve fat.

Al varès volût berlâ alt e fuart: Sassins! Ju vês copâts cence rimuars fin dal principi dai timps. Taiâts de vite dome pal vuestri plasè! A àn ancje lôr une anime!! Lis carotis, i cudumars, lis patatis, dutis lis verduris e lis pomis a meritin di vivi cence jessi sfrutâts fin de semence. Cjalait la magle parsore il vuestri amât “Arcimboldo”! Molait il vert e butaitsi al ros e al blanc des cjars. Vegjetarians sassins!!!

di Noemi Salva
#1856

1 comment