Il caleidoscopi magjic

Martin al jere un zovin plen di curiositât e amôr pe nature. Une dì, esplorant la sofite, intun vecjo baûl al cjatà il caleidoscopi dal nono. Al ricuardà che il vieli i veve contât che chel caleidoscopi al jere un portâl magjic che al varès colegât il so mont cun altris realtâts e che la bielece de magjie che al varès viodût e jere la stesse che si viodeve tal mont reâl, dome che a voltis al jere dificil percepîle.

Intrigât lu puartà in cjamare sô. Martin al decidè di cjalâ e si maraveà di viodi senis di un  mont diferent. Al viodè un bosc incjantât cun arbui che a ridevin, riui che a cjantavin e creaturis magjichis che a balavin sot la lûs de lune.

Ogni gnot Martin al cjalave a traviers dal caleidoscopi scuvierzint gnovis sensazions.

Al scomençà a dâsi cont dai piçui detais de sô vite cuotidiane: il lusôr di une gote di rosade, il cjant dai uciei a buinore e il ridi di un amì. Si inacuarzeve che i siei lambics si levin smavint e che la sô prospetive sore la  vite e scomençave a cambiâ.

Martin si puartave il caleidoscopi dapardut. Lu doprave no dome par viodi monts fantastics, ma ancje par ricuardâ che la vere magjie le veve tal so intôr, e che la bielece e je simpri presint, baste dânus il timp di savê viodile.

di Galliano di Buenos Aires
#1853

1 comment