CC24Avost#06 – Strissulis

#06 – Strissulis

Agns ’70, Lignan,savalon di bol, un vêl di borin, nô frutins o fasevin svolâ sacumis di avions di plastiche cun alis “rotantis” come chês di Mazinga, che a sbeleavin in stamp moderni i acuilons, cun alis che cul aiâr a frizevin come jespis in amôr. Chel zuc viodût sul savalon mi fasè insumiâ il gno progjet a cjase. No vevi tele par un acuilon vêr, ma doi biei vencs ju varès cjatâts là di Galo, il fîl di pescje robât a Enzo, une cjarte veline di chê des taulis de sagre e tantis strissulis di alumini di chê gnove robe che al jere il Domopack. Al è un biel retilini gnûf asfaltât di fresc insom dal gno paîs, o ai une bici cul cambi a cinc rapuarts regâl di comunion. Preparât il gno striament lu poi cualchi metri daûr di me e o tachi a pedalâ come un sfolmenât, comandant la leve dal cambi par dâi di vene aes gjambis. Biel planc si alçave il gno svualeton, e i davi fîl e lui al tetave, ancjemò fîl, ma insom de strade i cablis de alte tension che a puartin corint fin te Snia di Torviscose. Un Lamp! Il codaç di alumini si intortêe tai cablis. Dut un cisâ, fondût il fil di pescje fin tal manuvri e mi fermi cul cûr a ton. Soio un parefulmin o dome un parecûl? E cuant che i zenoi no tremin plui mi rinfrescji la muse te ledrute di flanc.
Si torne a scuele e spietant la coriere il casaro nus slungjie cualchi strissule di formadi crei, pe mirinde.
Cressût, un tîr: strissule blancje di bon fum, une cjartine fate in compagnie.
Zoventût , il cûr fat a strissulis di une biele fantate che no ti caghe nancje di stris.
E ce strissule in chê volte che o vin fat fûr 20 biris par om.
Strissulis di sanc lassadis di tancj amîs su pes stradis in moto o in machine.
Strissulis di disperazion di chescj ultimis agns dulà che nissun ti scolte ma in tancj ti scrivin.
Strissulis a vagons di ignorance, insoference, indiference, impazience, malegracie e coiarìe.
Strissulis di peraulis parsore un libri viert, o intivi, e ti si verzin i voi e il cûr!

di Siruc
#1721

1 comment