CC24Lui#13 – Tornâ

#13 – Tornâ

Simon al pensave ae sô vite, dute sbaliade.
“Se podès tornâ indaûr a chê sere! Al è stât di li che dut al cambiât e che ài pierdût la cjase, il lavôr, Laure! Se si podès tornâ indaûr, stuarzi il timp tant che un anel ator dal dêt e tornâ a tacâ!”
Cheste la sô crôs, fin che une dì, di cualchi bande, al veve let che intun lûc misteriôs de Americhe dal Sud e je une aghe che si bêf e che e fâs zirucâ il timp.
“Se la aghe e va jù pai lavandins in sens antiorari, se lis stelis tal cîl a son robaltadis e dut al è a cjâf in jù, forsit, ancje il timp al puès vê un altri cors e tornâ indaûr!”
Cussì al jere partît. Lis informazions che al veve no jerin precisis e lu puartarin de Patagonie al Venezuele, cirint flums e vals platadis, domandant a missionaris e indios dentri des selvis plui rimidis.
Dopo tant cirî, al ve l’indret: si tratave di un puest proibît e, par chel, nissun lu varès compagnât.
Par dîs al cjaminà te foreste, jenfri Brasîl e Colombie, fin cuant che al cjatà une risultive di aghe torgule che e sbrocave fûr dapît di un slarc plen di pieris grandis e lissis.
Simon si sentà ad ôr de poce, al slungjà lis mans a cop e si puartà cualchi glut in bocje. Al jere penç, al saveve di pantan amâr. Dopo un cuart di ore, al començà a sintî alc di strani e in curt dut il mont i pareve strassomeât. Al viodeve plantis fraidis tornâ verdis, fueis coladis svualâ tant che paveis par tornâ sul ramaç, i rais dal soreli ritirâsi e i colôrs mudâ in tintis mai viodudis.
Si sintive dut savoltât e, di bot, al començà a viodisi tornâ indaûr: lis olmis dai pas, il so viaç, ducj i siei agns a lavin al contrari.
Al viodeve lis senis de sô vite che a zirucavin e lui, cul flat curt, al sbolseave spietant l’istant just dulà fermâsi. Dome che il timp al lave masse svelt e lui nol rivave a blocâlu. E intant dutis lis sôs azions passadis a tornavin, si strucavin dentri di lui pesantis tant che il plomp, dutis lis peraulis ditis a jentravin in bocje e lu scjafoiavin, ducj i pinsîrs e tornavin a impirâsi tal çurviel fin a fâlu sclopâ. Tal ultin, al colà in fastidi.
La dì dopo, un trop di indios che al passave di li al cjatà une piere gnove dongje di chês altris. Le cjalarin par un pôc, podopo, cuntun baston a tirarin une linie par tiere e, scjassant il cjâf, a impirarin un troi te selve.

di Stiefin Morat (Catine la Nere)
#1701