CC24Mai#03 – Elezions in Sicilie

#03 – Elezions in Sicilie

In Sicilie, dulà che, si sa, a son simpri stâts famôs par tirâ dentri un grum di int te aministrazion publiche, chê volte ca a si son propit superâts !
Di fat, in ocasion des ultimis elezions politichis, dopo che i presidents, i scrutinadôrs e i segretaris dai segjos a vevin rugnât parcè che ciertis operazions eletorâls no jerin di lôr competence, il Comun di Palermo al à decidût di meti a vore trê di lôr cul compit di zirâ par ducj i segjos eletorâi de citât par… fâ la spice ai lapis che a coventin par votâ!
Ma nol baste: il Consei Comunâl al à scugnût riunîsi cinc voltis par rivâ a tirâ fûr il non just e adat par chest gnûf incaric, cun cheste formule: “Operatore addetto alla manutenzione degli accessori di cancelleria nonché alla raccolta ed allo smaltimento dei relativi rifiuti situati all’interno degli Uffici Comunali aperti al pubblico“!
Altris cinc riunions straordenariis a son coventadis ancje par metisi dacuardi su ce model di imprest sielzi par fâ chest lavôr: se di plastiche o di alumini, di cuâl colôr e se cuntune o dôs busis… Soredut ur tocjave nomenâ la fabriche che e varès furnît i tocs. Ma par decidi su chê robe lì a son bastâts dome cinc minûts e cun nissune discussion, cuissà parcè… Sot vie però si è ancje savût il non de dite che je stade incaricade: “Fratelli Cannamozza di Corleone”…
E no je ancjemò finide: prime di firmâ il contrat, i trê nomenâts a lavorâ come spiçadôrs di lapis, dal moment che a dovevin presentâsi in public par cont dal Comun, a àn pretendût di vê in dotazion ancje la divise, cun tant di barete, e naturalmentri di vê ancje lis manecis, par no sporcjâsi masse i dêts e ancje par no sbusâsi, biel che a jerin daûr a distrigâ chel lavôr uficiâl cussì delicât!
Noaltris furlans o vin dome ce imparâ…

di Renzo Turùs (Chel di Cormons)
#1632

1 comment